Қосшы қаласының қоғамдық мәдени-спорт кешенінде «Саз аспаптары шеберлерінің одағы» республикалық қоғамдық бірлестігінің құрылуына орай І республикалық құрылтай өтті. Тағылымды іс-шараға Сенат депутаты Дархан Қыдырәлі, Мәжіліс депутаты Асхат Аймағамбетов, Қосшы қаласы әкімінің орынбасары Берген Жұмкейұлы, күйші Жанғали Жүзбай мен Қайрат Айтбаев, ақын Дәулеткерей Кәпұлы, Күләш Байсейітова атындағы ҚазҰӨУ проректоры Раушан Нұртаза, аталған оқу орнының профессорлық-оқытушылар құрамы қатысты.
Жиында Асхат Аймағамбетов бірнеше маңызды мәселенің түйінін ағытты. Олардың ішінде ұлттық аспаптарды мектептер мен колледждерге сатып алу жүйесін жетілдіру, шеберлердің тәжірибесін келесі ұрпаққа үйрету – дәстүр сабақтастығын үзбеу, ұлттық мұрагерлердің тізімін жасап, сертификаттау арқылы ресми қолдау көрсету, «Шебер», «Ұста» секілді мәртебелерді ресми мойындау және қорғау қажеттігі сынды елеулі тармақтар бар.
– Бұл – материалдық емес мәдени мұрамызды сақтаудың маңызды жолы. Өйткені әрбір шебердің қолынан шыққан домбыра, қобыз, сазсырнай – жай ғана аспаптар емес, халықтың үні, ұлттың жаны. Сондықтан шеберлерге тек мәдениет қызметкері емес, ұлт мұрасының сақшысы ретінде де қарауымыз керек, – деді Асхат Аймағамбетов.
Жаңа құрылған ұйымның төрағасы болып айтыскер ақын Еркебұлан Қайназаров сайланды. Алқалы жиында қолға алып отырған жұмыс туралы айтқан Сенат депутаты Дархан Қыдырәлі бірлестік жұмысына сәт сапар тіледі.
Іс-шараға еліміздің түкпір-түкпірінен жиналған Жолаушы Тұрдығұлов, Нарбек Оханов, Сұлтан Мұсаев, Бақытжан Ділманов, Бабыр Арғынов сынды шеберлер салаға қатысты жүйелі мәселе көтеріп, қуанышын білдірді.
– Қазақ халқының рухани мұрасы мен музыкалық мәдениеті ғасырлар бойы саз аспаптарының үнімен ұштасып келеді. Қобыз, домбыра, сазсырнай, шертер, жетіген сияқты аспаптар тек музыкалық құрал емес, ұлттың рухани жадын сақтаушы рәміз ретінде танылған. Құдай қаласа, бүкіл қазақ шеберлерінің мұң-мұқтажын айтатын, шеберліктің жолын әрі қарай жалғастыратын, соған байланысты үлкен мәселелерді шеше алатын айтулы одақ болады деп сенеміз, – деді Жолаушы Тұрдығұлов.
Сөз алған сарапшылардың пікірінше, елімізде 300-500 арасында музыкалық аспап шебері бар. Құрылтайда «Саз аспаптары шеберлерінің одағы» бірлестігі кәсіби шеберлердің басын біріктіріп, ұлттық аспап өндірісінің сапасын арттыру туралы сөз болды. Сонымен бірге дәстүрлі технологияларды жаңғыртуды және жас мамандарды тәрбиелеуді басты назарда ұстап, осы жолда шәкірт тәрбиелейтін ұстаздар керегі айтылды. Ұйым алдағы уақытта шеберлердің біліктілігін арттыру курстарын, көрмелер мен фестивальдар өткізу арқылы мәдениетті насихаттау іс-шараларын жоспарлап отырғанын алға тартты.
Айта кетсек, Қосшы қаласының әкімдігі биыл наурыз айында қолөнер шеберлерінің басын қосып, қоғамдық мәдени-спорт кешенінің ішінен шеберлер залын ашқан. Ол залда елімізге және әлемге танымал шеберлер Бектас Кәрімұлы, Асхат Бозымбай, Нұржан Ділманов, Әлия Қалиасқаровалардың бұйымдары бар. Енді мұнда «Саз аспаптары шеберлерінің одағы» республикалық қоғамдық бірлестігінің жұмысы жалғасады.
