Суретті түсірген – Игорь БУРГАНДИНОВ
Басқосуда «Қазпошта» АҚ «Балаларға сый жаса: газет-журналдарға жазыл» әлеуметтік жобасын іске қосты. Жоба қиын өмірлік жағдайға тап болған балаларды танымдық және ойын-сауық басылымдарымен қамтамасыз етуге бағытталған. Яғни акцияның әрбір қатысушысы 3 мыңнан астам баспа басылымдарына: қоғамдық-саяси және ғылыми-көпшілік басылымдардан бастап балалар мен ойын-сауық басылымдарына дейін жазылуды рәсімдеп, оларды қамқорлық пен мейірімге мұқтаж балаларға бере алады.
– Белгілі қаламгерлер мен журналистердің қолынан шыққан баспа басылымдары қашанда білім мен ақпараттың таптырмас қайнар көзі болған. Жазылушы күні – журналистердің еңбегі мен олардың өмірлік ұстанымын құрметтейтін достар мен пікірлестердің кездесуі. Қазпошта үшін мерзімді баспасөзді тарату – маңызды әлеуметтік миссия. Үлкен қала болсын, шалғай ауыл болсын – бізге әрбір жазылушы қымбат. Пошташылар жыл сайын газет-журналдардың жаңа басылымдарын жеткізу үшін мыңдаған шақырым жол жүреді, ал сұрыптаушылардың қолынан күн сайын он мыңдаған дана өтеді. Әр үйге, әр жазылушыға пошташыларымыз арқылы жылы сөз бен ілтипат жетіп жатқанын мақтан тұтамыз, – деді «Қазпошта» АҚ пошта сервисі және мемлекеттік қызметтер жөніндегі басқарушы директоры Бағлан Оразбай.
Сондай-ақ ол «Қазпошта» АҚ-ның республикалық және өңірлік басылымдармен берік әріптестік қарым-қатынас орнатқанын айтты. Осы орайда іс-шараға қатысқан «Қазақ газеттері» ЖШС бас директордың бірінші орынбасары Виктор Пряников пен «Egemen Qazaqstan» газеті бас редакторының орынбасары Орынбек Өтемұрат мерекелік ізгі тілектерін жеткізіп, ынтымақтастықты нығайта беруге ниетті екендерін айтты.
Жиында шеберлік сабақтары, мерзімді басылымдар жәрмеңкесі және бүкіл отбасы үшін тақырыптық іс-шаралар да ұйымдастырылды. Алғашқы жазылушылар эксклюзивті сыйлықтар мен естелік кәдесыйлар алып, көпшілікті кітап оқуға деген сүйіспеншілік төңірегіне біріктірген игі бастаманың бір бөлігіне айналды.
Айта кетейік Ұлттық пошта операторы бүгінде 6 161 елді мекенді қамтитын 2 мыңға жуық бөлімшелері бар еліміздегі ең кең тармақталған филиалдар желісіне иелік етеді.
