Сурет: el.kz
Құрылғы адамның әрбір қадамын бақылап, дене салмағын, жүрістегі ауытқуларын анықтап береді. Жобаны «ISSAI» құрамындағы жетілдірілген роботтехника және мехатроника жүйелері лабораториясы жүзеге асырып отыр.
Лаборатория меңгерушісі Азамат Ешмұхаметовтің айтуынша, құрылғының негізі – жасанды интеллект пен наносенсорлар. Ұлтарақтың ішіне орнатылған жоғары дәлдіктегі сенсорлар адамның қозғалысын бақылап, нақты мәліметтерді компьютерге жібереді. Ал жүйе бұл деректерді талдап, экран арқылы көрсетеді. «Біздің жобамыз – қарапайым ұлтарақ емес, ол нақты диагноз қоя алатын құрылғы. Адам жүрген кезде қай тұсқа салмақ түсіріп жатыр, қозғалыс симметриялы ма, жоқ па бәрін бірден көруге болады. Біз мұнда өте сезімтал наносенсорларды пайдаланамыз. Олардың көмегімен жүрістің дәлдігі мен салмақтың таралуын анықтаймыз», дейді зерттеуші.
Құрылғыны медицина саласында қолдану өте тиімді болмақ. Қазірдің өзінде бірнеше клиникада қанатқақты жоба ретінде пайдаланылып жатыр. Мамандар науқастардың табанына ұлтарақты салып, екі минут ішінде жүрісіндегі ауытқуларды анықтай алады. «Кейбір адамдар сырттай қарағанда дұрыс жүретіндей көрінеді. Бірақ ұлтарақты салып, нақты көрсеткішті көргенде, салмақты тек өкшесіне немесе бір жақ тізесіне ғана түсіріп жүргені анықталады. Мұндай қате жүріс уақыт өте келе буындарға, омыртқаға, аяққа салмақ түсіреді. Біз бұны ерте анықтап, адамдарға «салмағыңызды оң аяққа теңдей түсіріңіз, фазалық қозғалысты өзгертіңіз» деген сияқты кеңес береміз. Мұның бәрін жасанды интеллект талдап береді», дейді Азамат Ешмұхаметов.
Ұлтарақ диагноз қойып қана қоймайды. Ол оңалту барысын да бақылап отырады. «Біз адамның денсаулығындағы өзгерісті дәл көрсетеміз. Науқастар апта сайын өзгерістерді өздері көріп, қарап отырады. Бұл оңалуға деген сенімді арттырады», дейді зертхана меңгерушісі.
Инженерлер болашақта құрылғыны спортшыларға, әскери қызметкерлерге, ауыр дене еңбегімен айналысатын жұмысшыларға бейімдеуді көздеп отыр. Себебі дұрыс жүріс – тек қозғалыс мәселесі емес, адамның жалпы денсаулығына әсер ететін маңызды фактор.
