Қазақ әдебиетінің алып бәйтерегі тұрған ауылды, әдеби-мемориалдық үйді арнайы көруге еліміздің әр қиырынан ағылып жатқан азаматтар да жеткілікті.
Шерағаңның шаңырағында оның әдеби мұрасынан бөлек, бильярд үстелі, түрлі басылым тігінділері, өткен шақтан сыр шертетін біршама тарихи заттар сақталған. Мұнда келгендер мұражайдағы әрбір құндылыққа айрықша назар аударатыны белгілі. Соның бірі – анасы Айшаның тігін машинасы. Жылдар бойы сақталған «Зингер» тігін машинасы көзге оттай басылады.
«Қара шаңырақта тұрған Райхан апайымыз бұл тігін машинасын біраз уақыт бұрын арнайы тапсырған болатын. Бізге келушілер Айша апамыздан қалған мұраның тарихына тереңірек үңіліп жатады. «Зингер» тігін машинасы Шерағаның шығармаларында да аз жазылған жоқ», дейді әдеби-мемориалдық үйдің қызметкерлері.
Расында, Шераға шығармаларында «Зингер» тігін машинасын атау арқылы тағдырының тақтасындағы ауыр күндерді есіне түсіретіні баршамызға мәлім.
«Менің анам Айша шебер тігінші еді. Баяғыда бай бабадан қалған «Зингер» машинасымен бүкіл ауылдың киім-кешегін осы Айша тігетін. Сонда әртүрлі матадан қалған қиықтарды құрастырып, мақталап, түрлі түсті әп-әдемі көрпешелер жасайтын», деп Шерағаң да мехнатқа толы сол бір шақты есіне алушы еді ғой. Қалай десек те, жазушы шығармашылығында жиі көрініс тапқан тарихи бұйымның құнды экспонат ретінде сақтаулы тұрғаны көңіл қуантады.
Жамбыл облысы,
Жуалы ауданы,
Талапты ауылы
