Фото: aikyn.kz
«Осы заң жобасының ұйытқысы болған біздің депутат әріптестерімізді ерекше атап өткім келеді. Бұл – өз уақытында көтерілген әрі өте маңызды бастама, себебі цифрландыру экономиканың дамуына және мемлекеттік басқарудың тиімділігін арттыруға ықпал ететін негізгі факторлардың бірі», деді депутат.
Мәжіліс депутаты нақты тармақтарға тоқталды.
«Цифрландыру саласында Ұлттық даму институтын құру туралы түзету талдау жұмыстарын және сараптаманы күшейтуге бағытталған қадам сияқты көрінеді, алайда бұл институт нақты қандай іспен айналысатынын түсіну қажет.
Алдыңғы цифрлық бастамалардың тарихы бізге маңызды тағылым береді. «Зерде» холдингі бастапқыда цифрлық дамудың қозғалтқышы ретінде құрылғанымен, іс жүзінде функциялардың шоғырлануына, тиімсіздікке және қағазбастылыққа алып келді», деді Әбутәліп Мүтәлі.
Дербес деректерді қорғау және киберқауіпсіздік мәселелеріне жеке тоқталғым келетінін айтқан Ә.Мүтәлі Кодекс жобасында бұл мәселелерге арналған жеке баптар бар екенін, алайда олар цифрлық ортадағы барлық қатысушылардың мүддесін нақты қорғау үшін әлі де пысықталуы қажет екенін атап өтті.
«Соңғы жылдары елімізде интернет-алаяқтық пен жеке ақпаратты заңсыз пайдалану кең етек жайып отыр. Бұл жағдай мемлекеттік те, жеке сектордың да ақпараттық жүйелері толық қорғалмағандығын көрсетеді.
Бұл нормалардың практикалық тиімділігін күшейту қажет: дербес деректер операторларына бірыңғай талаптар енгізу, ақпараттық жүйелерді тұрақты аудиттен өткізу, ІТ-жүйелерді сертификаттау және деректердің таралу фактілері туралы азаматтар мен уәкілетті органдарға міндетті түрде хабарлау тәртібін белгілеу қажет», деді депутат.
Мәжілісменнің айтуынша осы тетіктерді енгізу қауіптерді дер кезінде анықтауға, келеңсіз жағдайлардың алдын алуға және азаматтардың, бизнес пен мемлекеттің мүддесін қорғауға мүмкіндік береді. Сонымен қатар мұндай шаралар елдің цифрлық және ұлттық қауіпсіздік мақсаттарын тікелей қолдайды.
«Қорытындылай келе айтарым - Цифрландырудың өзі түпкі мақсат емес екенін айқын түсінуіміз қажет. Ол – адамдардың өмір сүру сапасын арттыруға, бизнестің дамуына және мемлекеттік басқарудың тиімділігін күшейтуге қызмет ететін құрал. Біздің негізгі міндет – Цифрлық кодексті дәл осындай тиімді тетікке айналдыру. Ол бюрократияны көбейтетін немесе жаңа шектеулер тудыратын құжатқа айналмауы тиіс.
Осылай еткенде ғана біз ашық, қауіпсіз және тиімді цифрлық мемлекетке берік ірге болатын құжатты қабылдай аламыз.
Екінші оқылымға дейін жоғарыда аталған барлық мәселелерді мұқият пысықтау қажет», деп сөзін түйіндеді депутат Әбутәліп Мүтәлі.
