Суретті түсірген – Валерий Бугаев
Ел-жұрт басынан өткерген қиын-қыстау күндердің, қуанышты үндердің куәсіне, жақсылықтың жаршысы, игі істердің бастаушысына айналған «Ertis» арнасының мерейтойы облыс көлемінде аталып өтті.
Алпыс жыл ішінде аймақтың басты арнасы талай тарихи кезеңді бастан кешті. Экрандағы бейнелер ақ-қара түстен заман талабына сай түрлі түсті бейнеге ауысып, телестудиялар жаңарды. Өңірдің кез келген нүктесінен тікелей эфирде ақпарат тарату мүмкіндігіне қол жеткізді. Қазіргі уақытта арна заманға сай жобалар ұсынып, көрермен көңілінен шығатын контенттерді үзбей беріп келеді. Бұл қатарда «OILike», «Жаңа күн», «Бірінші студия», «Телеорталық», «Руханият», «Аманат», «Сарасөз» бен тағы басқа телебағдарламаларды атап өтуге болады. Биыл цифрлық технологиялар кең қолданыс тауып, виртуалды жүргізуші де пайда болды. Заман көшінен қалыспаған арна ұжымының дені – жастар.
«Ондаған жылдар бойы «Ertis» өңіріміздің үні болып келеді және солай болып қала беретініне сенім берік. Сіздер тарататын ақпаратқа халық сенеді әрі объективті ақпарат күтеді. Ұжым бұл міндетті абыроймен атқарып жүр» деп атап өтті өңір басшысы Асайын Байханов.
Облыс әкімі арнаның автокөлік паркін жаңартуға 30 млн теңгелік сертификат табыс етті.
ПАВЛОДАР
