Аталған дәріс барысында еліміздің 560 жылдық конституциялық даму тарихы сөз болды. Дала конституциясынан (Қасым хан, Есім хан, Тәуке хандардың әдет құқығы кодекстері) бастап Жаңа Қазақстан дәуірінің қазіргі реформаларына дейін қатысушыларға егжей-тегжей түсіндірілді. Дәрісте Қазақ мемлекеттілігінің қалыптасуының негізгі кезеңдері, хандар мен сұлтандардың, билер мен ұлттық зиялы қауымның рөлі айқындалды. Соның арқасында қазақ халқы елдігімізді сақтап, ең ауыр сынақтардан өте алғаны айтылды.
Бес тарихи кезең белгіленіп, қазақстандық конституционализмнің 12 негізгі деректі тірегі ұсынылды. Спикердің пікірінше, қазіргі кезеңнің басты құқықтық жетістігіне айналған Конституциялық соттың жандануын қоса алғанда, еліміздің конституциялық жаңғыруының жаңа кезеңін белгілеген 2022 жылғы конституциялық реформаға ерекше назар аударылды.
Мүсілім Хасенов – 2025–2026 оқу жылында Гарвард университетінің Дэвис орталығында «Болашақ» бағдарламасы аясындағы ғылыми тағылымдамадан өтуге шақырылған ғалым. Ол Орталық Азиядағы құқықтық реформалар мен құқық үстемдігіне арналған зерттеу жүргізіп жүр.
