Ақ үйдің басшысы Truth Social әлеуметтік желісіндегі жазбасында Венесуэла билігін мұндай шешімге жеткізген себептерді тізіп айтты. Оның айтуынша, венесуэлалық режим АҚШ активтерін заңсыз иемденіп қана қоймай, терроризмге, есірткі контрабандасына және адам саудасына қатысы бар.
«Біздің активтерімізді ұрлағаны және терроризм, есірткі тасымалы мен адам саудасы секілді көптеген қылмыстық әрекеттері үшін Венесуэла режимі шетелдік террористік ұйым деп жарияланды», деп жазды Дональд Трамп.
Сонымен қатар АҚШ президенті Венесуэла төңірегіндегі әскери белсенділіктің күшейетінін ескертті. Оның айтуынша, бұл ел бұрын-соңды болмаған ауыр қысымға тап болады.
«Олар үшін шок бұрын-соңды болмаған деңгейде болады. Бұл АҚШ-қа ұрланған мұнайды, жерді және өзге де активтерді толық қайтарғанға дейін жалғасады», деп мәлімдеді Трамп.
Оның сөзінше, Николас Мадуроның «заңсыз режимі» ұрланған мұнай кен орындарынан алынған ресурстарды өз қызметін қаржыландыруға, соның ішінде есірткі терроризміне, адам саудасына, кісі өлтіру мен адам ұрлауға жұмсап отыр.
АҚШ басшысының бұл мәлімдемесі халықаралық деңгейде Венесуэлаға қатысты қысымның жаңа кезеңі басталуы мүмкін екенін аңғартады.
