Сурет: gov.kz
Басқосуды Жазушылар одағы басқармасының төрағасы Мереке Құлкенов ашып, жүргізді. Іс-шара барысында одақтың бір жыл ішінде атқарған жұмыстары туралы бейнеролик көрсетілді. Сондай-ақ Парламент Сенатының депутаты Руслан Рүстемов Сенат төрағасы Мәулен Әшімбаевтың, Мәдениет және ақпарат министрінің орынбасары Айбек Сыдықов, Премьер-министрдің орынбасары – Мәдениет және ақпарат министрі Аида Балаеваның құттықтау хатын оқып берді. Ал Қырғыз Республикасының Мемлекеттік хатшысы, Қырғызстанның Ел жазушысы Арслан Койшиев, Қазақстанның халық жазушысы Төлен Әбдік, жазушы, Мемлекеттік сыйлықтың лауреаты Роза Мұқанова, жазушы, филолог-ғалым Нұрдәулет Ақыш, «Жаңа Қазақстанның әдеби-танымдық панорамасы» жобасының қатысушылары – жазушы Жақсылық Мұратбек пен ақын Азамат Әбілқайыр сөз сөйлеп, өз ой-пікірлерін айтты.
Сонымен қатар Әзербайжанның халық жазушысы, Әзербайжан Жазушылар одағының төрағасы Анар Рзаевтың, Өзбекстан президентінің кеңесшісі, жазушы Хайриддин Сұлтанның, ТҮРКСОЙ халықаралық ұйымының Бас хатшысы Сұлтан Раевтың құттықтаулары бейнебайланыс арқылы тыңдалды.
Жиын аясында «Түркі әлемінің әдебиеті» жобасы аясында шыққан 4 жаңа кітаптың, сондай-ақ «Жаңа Қазақстанның әдеби-танымдық панорамасы» жобасының аясында жарық көрген жас қаламгерлердің 20 кітабының тұсауы кесілді. Бұдан бөлек, «Қоғамдық маңызы бар әдебиеттерді басып шығару және тарату» мемлекеттік бағдарламасы шеңберінде басылған Қадыр Мырза Әлі мен Тұманбай Молдағалиевтің кітаптары таныстырылды.
Жазушы Төлен Әбдік елордада алғаш рет ұйымдастырылған мұндай жылдық қорытынды жиынның маңызын атап өтіп, Жазушылар одағының біржылдық жұмысына жоғары баға берді. Ал қырғыз жазушысы Арслан Койшиев іс-шараны ұйымдастырған Қазақстан Жазушылар одағына алғыс айтып, қазақстандық қаламгерлерді келер жылы өтетін Ыстықкөл халықаралық форумына қатысуға шақырды.
Өз кезегінде Жазушылар одағының төрағасы Мереке Құлкенов биыл атқарылған жұмыстарды қорытындылай келе, классик жазушы Төлен Әбдік пен қаламгер Қанат Әбілқайырдың кітаптарын халықаралық Букер сыйлығына ұсыну бағытында тиісті жұмыстар жүргізілетінін атап өтті. Сондай-ақ одақ басшысы биыл 75 жасқа толған астаналық белгілі қаламгер, журналист Несіп Жүнісбаевты мерейтойымен құттықтап, иығына шапан жапты.
Азамат ҚҰСАЙЫН
