Осыған дейін азулы америкалық ойыншы Энди Вудфорды ұтып, одан кейін әзербайжандық Айдын Сулейманлы, аргентиналық Фаустино Ора, испаниялық Даниил Юффа, украиналық Василий Иванчукпен тең ойнаған Бибісара келесі турда франциялық Марк-Андриа Мауриццимен кездесті. Жастар арасында әлем чемпионы деген атағы бар 18 жастағы шахматшыға Асаубаеваның әлі жетпеді. Қара фигуралармен ойнаған ол партияның орта тұсында қателік жіберді. Маурицци оны ұтымды пайдаланып, 42-жүрістен кейін жеңіске жетті.
Содан соң Бибісараның жолы Велимир Иличпен қиысты. Сербиялық шебер осы «Челленждер» санатындағы турнирдегі рейтингі ең жоғары ойыншы. Оның 2 638 ұпайы бар. Б.Асаубаеваның жиған ұпай қоры – 2497. Бибісара Иличпен тең ойнады. Кеше ол жасы 40-тан асқан аса тәжірибелі нидерландтық Эрвин л’Амимен кездесті. Қара тастармен ойнағанына қарамастан Бибісара басымдық танытып, таза жеңіске жетті. Осы табысынан кейін қазақ шахматшысы сегізінші орыннан қайта бесінші сатыға көтерілді. Асаубаеваның қоржынында 4,5 ұпай бар. Алдыңғы орындарда Марк-Андриа Маурицци (6,5), Энди Вудфорд (6,5), Айдын Сулейманлы (6), Василий Иванчук (4,5) сынды гроссмейстерлер тұр.
