Жоспарға сәйкес, «Тургунди – Герат – Кандагар – Спин-Болдак» бағыты бойынша теміржол желісін салуға дейінгі инвестиция көлемі 500 млн долларға бағаланып отыр. Бұл бағыт Қазақстан үшін солтүстік және Каспий маңы дәліздеріне балама ұсынып, дәстүрлі транзит жолдарына тәуелділікті азайтуға мүмкіндік береді.
Жоба болашақта Орталық Азия мен Оңтүстік Азияны жалғайтын трансұлттық көлік дәлізінің негізгі буыны ретінде қарастырылып отыр. Сарапшылардың пікірінше, мұндай бағыт аймақтық сауда көлемін арттырып, жүк тасымалының географиясын әртараптандыруға жол ашады.
Көлік вице-министрі Жәнибек Тайжанов жобаның жоспарлы түрде іске асырылып жатқанын мәлімдеді. Оның айтуынша, ақпан айында Қазақстан, Ауғанстан және Біріккен Араб Әмірліктері арасында үшжақты меморандумға қол қою көзделіп отыр. Сонымен бірге маршрутты қолдаған Пәкістан тарапымен жеке құжат бекіту жоспарланған.
2029 жылға дейін Қазақстанда 11 мың шақырым теміржол желісі жөнделеді
Ресми дерекке қарағанда, бұл бастама Қазақстанның көлік-логистикалық стратегиясында маңызды орын алады. Ел үшін Үнді мұхиты бағытына шығу жаңа нарықтарға жол ашып қана қоймай, өңірлік транзиттегі рөлін күшейтуге ықпал етеді.
