Орталықта 18 жастан асқан, психоневрологиялық аурулары бар, I, II топтағы мүгедектігі бар қызмет алушыларға стационарлық жағдайда арнаулы әлеуметтік қызмет көрсетіледі. Бұған дейін мекеме аумағында 1964, 1970 жылдары салынған екі корпус жұмыс істеп тұрған еді. Енді, міне, заман талабына сай жаңа ғимарат іске қосылып отыр.
Қосымша корпустың жалпы аумағы 6 281,8 шаршы метрді құрайды. Нысан халықты әлеуметтік қорғау саласындағы арнаулы әлеуметтік қызметтер көрсету стандарттарына толық сәйкес келеді. Ғимаратта арнайы еңбек шеберханасы, медициналық кабинеттер, заманауи асхана, шаштараз бөлмесі, кітапхана, жатын бөлмелері қарастырылған.
Ғимараттың ашылу салтанатына облыс әкімі Берік Уәли мен облыс прокуроры Ерлан Абаев қатысты. Өңір басшысы жаңа нысанның әлеуметтік маңызына тоқталып, мекеме ерекше күтімді қажет ететін азаматтарға қолайлы әрі қауіпсіз орта қалыптастыруға бағытталғанын атап өтті.
– Мемлекет басшысы Қасым-Жомарт Тоқаев Қазақстан халқына Жолдауында: «Мемлекет әр азаматтың лайықты табыс тауып, сапалы әлеуметтік қызмет алып, ертеңгі күніне сенімді болуы үшін барынша жағдай жасай береді», деп әлеуметтік саланың маңызын айрықша атап өтті. Жаңа ғимаратты пайдалануға беру – халықты әлеуметтік қорғау саласында арнаулы әлеуметтік қызметтер көрсету стандарттарына сай, қызмет алушыларды бір адамға 5 шаршы метрге дейінгі тұрғын үй алаңымен қамтамасыз етуге мүмкіндік береді. Сонымен қатар қосымша корпус санитарлық-гигиеналық, эпидемияға қарсы талаптардың сақталуын қамтамасыз етеді. Сондай-ақ қызмет алушыларға да, орталық персоналының жұмысына да неғұрлым қолайлы жағдайлар жасап, медициналық, әлеуметтік қызмет көрсету сапасын арттырады. Облысымызда заңсыз шығарылған активтерді қайтару есебінен 25 нысанның құрылысы басталған. Бүгінде үшеуінің құрылысы аяқталды. 22 нысанның құрылысы жүргізіліп жатыр. Жалпы, бұл мақсатқа 22 млрд теңге қаржы қарастырылды. Осы игі іспен айналысқан прокуратура, құқық қорғау органдары қызметкерлеріне Абай облысы жұртшылығы атынан алғысымызды білдіреміз, – деді облыс әкімі.
Әкімдіктің дерегінше, нысан іске қосылғаннан кейін жаңа жұмыс орындары ашылып, өңірдегі әлеуметтік қолдауға мұқтаж азаматтарға сапалы қызмет көрсетіледі. Жалпы, өңірде 23 800 мүгедектігі бар адам тіркелген. Осы жылы аймақтағы 15 мыңнан астам мүгедектігі бар жанды техникалық оңалту құралдарымен, оңалту қызметтерімен қамтамасыз ету мақсатында 3,3 млрд теңге бөлінді. Сонымен қатар әлеуметтік, көлік инфрақұрылымы нысандарының қолжетімділігін қамтамасыз ету мақсатында биыл 200 нысанды бейімдеуден өткізу жоспарланып отыр. Облыста арнаулы әлеуметтік қызметтермен 6 мыңға жуық адам қамтылған.
Облыс әкімі баспасөз қызметінің хабарлауынша, Мемлекет басшысының тапсырмасын орындау мақсатында Үржарда балаларға арналған арнаулы әлеуметтік қызмет көрсету орталығының жанында салынған қосымша ғимараттың құрылысы аяқталып, биыл пайдалануға беріледі. Сондай-ақ Бородулиха ауданында, Семей қаласында орналасқан қарттар үйіне ағымдағы жөндеу жұмыстары жүргізіледі. Әлеуметтік мекемелердің қызметін арттыру мақсатында 20 автокөлікті (оның ішінде 7 инватакси) лизинг арқылы сатып алу жоспарланған.
Абай облысы
