Оңтүстік Кореяда MERS вирусы құрбандарының саны 32-ге жетті

АСТАНА. 28 маусым. Оңтүстік Кореяда MERS коронавирусын жұқтырған тағы бір адам көз жұмды. Осылайша қауіпті вирус құрбандарының саны 32-ге жетіп отыр. Бұл туралы РИА «Новости» хабарлады. Қазіргі таңда бұл елде қауіпті вирусты жұқтырғандар саны 182-ге жеткен. Бүгінге дейін дертке шалдыққан 91 адам ауруханадан емделіп шыққанымен, 2 жарым мыңға жуық адам әлі карантинде ұсталып отыр. Әлі күнге дейін вирусқа қарсы ешқандай вакцина табылмаған. «Ренхап» жергілікті ақпарат агентігінің хабарлауынша, соңғы тәулікке дейін вирус жұқтырғандар туралы жаңа мәлімет түспеген. Бір айта кетерлігі, дүние жүзін дүрліктірген қауіпті індетті жұқтыруға иммундық жүйесі әлсіздер, созылмалы өкпе дертіне шалдыққандар, диабетпен және бүйрек ауруымен ауыратындар бейім келеді. Дүниежүзілік денсаулық сақтау ұйымының мәліметтеріне қарағанда, 20 маусымға дейін MERS вирусын жұқтырғандар саны әлем бойынша 1 334-ке жеткен. Ал аурудан 471 адам көз жұмған. Салдарынан коронавирус құрбандарының көрсеткіші 40 пайызға жетсе, Оңтүстік Кореяда қаралы тізім 17 пайызға жақындаған. Еламан Қоңыр. Дерек, сурет: РИА «Новости».