Канадада тағы бір жолаушылар ұшағы апатты жағдайда қонды

АСТАНА. 29 наурыз. Бүгін Канадада тағы бір жолаушылар ұшағы келеңсіздікке тап болды. Air Canada әуе компаниясына тиесілі А320 ұшағы қону кезінде арнайы жолақтың жиегіне шығып кеткен. Соның салдарынан 25 адам түрлі деңгейдегі дене жарақаттарын алды. Бұл туралы РИА «Новости» хабарлады. Апатты жағдай Канаданың Галифакс қаласында тіркелді. Ұшақтың жол жиегіне шығып кетуіне ауа райының қолайсыздығы себеп болған. Өйткені әуе көлігі қонған кезде толассыз қар жауып тұрған еді. Соған байланысты ұшқыш арнайы жолақтың шамдарын жөнді көрмеген. Тіпті қону кезінде электр желілеріне ақау келтіріп, әуежай бір сағат бойы жарықсыз қалды. Келеңсіздік кезінде ұшақта 132 жолаушы мен 5 экипаж мүшесі болған. Жарақат алған 25 адам дереу жергілікті ауруханаларға жеткізілді. Ұшақ Торонто қаласынан ұшып шыққанын айта кетейік. Еламан Қоңыр. Дерек, сурет: РИА «Новости».