Степногорлық жас токарь жеңіспен оралды

СТЕПНОГОРСК. 28 тамыз. Степногорск қаласындағы №2 индустиалдық-техникалық колледжінің түлегі Әділет Текежанов Бразилияның Сан-Паулу қаласында өткен 43-ші «WorldSkills Competition» халықаралық кәсіби шеберлік байқауының жеңімпазы атанды. Бұл туралы egemen.kz тілшісі хабарлады. Қазақстан ұлттық құрамасынындағы ол «Токарлық іс» атауында алдына жан салмады. Бұл айтулы жарысқа 70 елдің жұмысшы мамандығын игерген таңдаулы жастары қатысты. Қазақстан командасы мұндай жарысқа тұңғыш рет жолдама алған еді. Халықаралық байқауға еліміздің 15 облысынан, Астана және Алматы қалаларынан алдынала іріктеу жарыстары өткізілген болатын. Мұнда үміткерлер кірпіш қалау, әрлендіру, темір жону, дәнекерлеу, мейрамхана қызметі, шаштараздық өнер, тағы басқа мамандықтар бойынша сынға түсті. Облыс әкімі Сергей Кулагин өз ісінің шебері атанған Әділетті жоғары табысымен құттықтап, бағалы сыйлық тапсырды. -Алыстағы Бразилиядағы конкурста өз еліңді сүюдің, оның абыройын әлемдік деңгейде қорғаудың не екенін мықтап сезіндім,-деді Ә.Текежанов жауап сөзінде. Бақберген Амалбек. Дерек, сурет: egemen.kz