16 этносты ұйыстырған ұжым

Генерал-майор Берік Біләлов жетек­шілік ететін облыстық ішкі істер депар­таменті халық арасындағы жарасымды достық пен татулықты ұлықтайтын іс-шараларды жүйелі өткізіп келеді. Солардың бірі жуырда Қазақстан халқы Ассамблеясының 20 жылдығы мерекесі аясында ұйымдастырылып, өңірді мекен ететін ұлыстардың салт-дәстүрлері мен әдет-ғұрыптарын насихаттауға арналды. – Ұлттық мәдениеттердің бір-бірі­мен тығыз байланыстылығы еңбек ұжым­да­рын­да тату-тәтті бірліктің қа­нат жаюы­на, қоғамдағы ұлтаралық және кон­фес­­сия­­аралық тұрақтылықтың кепіл­ді­гі­­не зор септігін тигізеді. Өзге тілге, дін­­ге құрметпен, сыйластықпен қа­рау зайыр­­лы мемлекеттің басты өлшем­дері­­нің бірі болып табылады. Адам­дар­дың ер­теңгі күнге деген берік сенімін қалып­­тастырады,–деді шараға қатысқан ай­мақ бас­­шысының орынбасары Анархан Қали­қызы жи­налғандарға қарата айтқан сөзінде. Ішкі істер органдарында қызмет ете­тін 16 этнос өкілдерінің басын тоғыс­тырған фестиваль аудандағы полиция қызметкерлерінің бесаспап өнерлерін паш етумен ерекшеленді. Тайынша аудандық ішкі істер бөлімі поляктардың ұлттық киімдерін киіп, әндерін шырқап, өздері әзірлеген тағам мәзірлерін ұсынды. Бұл ауданда өткен ғасырдың саяси қуғын-сүргін кезеңінде атақонысынан лажсыздан аласталып, Қазақстанға қоныс аударған поляк туысқандардың ұрпақтары көп шоғырланған. Сол себепті «түсі басқа тілегі бір, жүзі басқа жүрегі бір» ағайындардың тағылымды өнегелерін бейнелеуді жөн көріпті. Тайынша аудандық ІІБ-нің криминалисі Дарья Солонарьдың айтуынша, поляк халқының сүйікті тағамы – бигос көпшілікке ұнап қалыпты. Қазылар алқасының бағалауымен украин халқының салт-дәстүрін үздік көрсете білген мамлюттіктер бірінші орынға лайық деп танылды. Екін­ші, үшінші орындарды петропавл­- дықтар мен тайыншалықтар бөлісті. Фестиваль аясында «Біздің отбасы» конкурсының қорытындысы шығарылып, мемлекеттік тілде шығарма жазған үміткерлердің жеңімпаздары анықталды. 7-9 жас аралығында әл-Фараби лицейінің 3-сынып оқушысы Гауһар Маратова өз туындысына отбасын арқау ете отырып, көпбалалы шаңырақтың артықшылықтарын жіпке тізгендей атап берген. 10-12 жас бойынша Мамлют мектеп-интернатының оқушысы Ділнәз Шаяхметова бірінші орынға ие болды. 13-15 жас аралығында Тайынша ауданынан келген Айара Шаханова жеңістің ең биік тұғырына көтерілді. Шара соңында Берік Сұлтанғазыұлы қоғамдық жұмыстарға белсене қатысып, еліміздің лайықты азаматтарын тәрбиелеуге үлес қосып жүрген бір топ ата-ана мен этно­мәдени бірлестік өкілдерін марапаттады. Өмір ЕСҚАЛИ, «Егемен Қазақстан». Солтүстік Қазақстан облысы. Суретті түсірген Талғат ТӘНІБАЕВ.