“Барыс” бабында екенін байқатты

Осы аптада Астанада хок­кейден Қазақстан Президенті кубогы жолындағы халықаралық турнир бастау алды. Ертең аяқ­талатын турнирге Қазақстан, Латвия, Ресей және Беларусь ел­дерінен “Барыс” (Астана), “Ди­намо” (Рига), “Атлант” (Мәс­кеу облысы) мен “Динамо” (Минск) командалары қатысуда. Кешегі турнирдің демалыс күнін есептемегенде, командалар алғашқы екі күнде екі кездесуден өткізіп үлгерді. Соның ішінде Астананың “Барыс” клубы ал­ғашқы ойынын ресейлік “Атлант” командасымен өткізіп, 4:2 есе­бі­мен жеңсе, екінші ойынында Ри­ганың “Динамо” командасынан дәл осындай есеппен басым түсті. Басқа ойындарға келсек, Минс­кінің “Динамосы” Мәскеу облы­сы­ның “Атлант” клубын 6:2, Лат­вияның “Динамо” командасын 3:2 есебімен ұтты. Бүгін “Барыс” пен “Динамо” (Минск) кездессе, “Атлант” Ри­ганың “Динамо” командасымен мұз айдынына шығады. Ал ертең көрсеткен нәтижелеріне қарай командалар бірінші және үшінші орындар үшін таласатын болады. Қазір осылардың ішінде “Барыс­тың” басқаларға қарағанда тур­нирді жеңіп алу мүмкіндігі көп. Екі ойында қажетті ұпайды жи­наған астаналық команданың ен­дігі нағыз қарсыласы Минскінің “Динамо” командасы болатыны сөзсіз. Бұл команда да екі ойы­нын жеңіп, алаң иелерімен иық теңестіріп келеді. Қазақстан хоккей федерация­сы­мен “Нұр Отан” ХДП-ның ұйымдастыруымен өтіп жатқан турнирдің жүлде қоры – 3 млн. теңге немесе 20 мың АҚШ дол­ла­ры. Осы сомадағы қаржы елі­міз­де алғаш рет хоккейден өткі­зі­ліп жатқан Президент Н.Назар­ба­ев­тың кубогы жолындағы тур­нирде бас жүлдені алған коман­да­ның қоржынына түседі.