Істің көзін тапқан

Қазақстанда қазіргі уақытта жылыжайлар саны жыл сайын артып келеді. Осының барлығы еңбекқор және қолынан іс келетін адамдардың арқасында. Олардың бірі ­ Шайқорық ауылы­ның тұрғыны Қуанышбаев Абдра­хим Абдрахманұлы. Абдрахим Аб­дра­хманұлы алысқа қатынайтын жүр­гізуші болып жұмыс атқарған кезде көптеген шет елдерге шық­қан. Сол уақыттан бастап жолы түскен елдердің ауыл шаруашы­лы­ғына ерекше назар аударған еді. – Осы елдерде болған кезімде олар­дың технологияларына және ауыл шаруашылығы тауарларын өн­діру тәсілдеріне қызыға қарай­тын­мын. Сол кезден бастап, шір­кін, осы жаңа технологияларды жә­не тәсіл­дерді өз елімде қолданатын болсақ қой деп армандайтынмын, – деп бастады сөзін Абдрахим ағамыз. Содан өз ісін бастап кетуге Аб­драхим Абдрахманұлының қаража­ты жетпеді. Бірақ қолдың қыс­қа­лығына қарамастан Абдрахимның үміті үзілген жоқ. – Жылыжай салуға қаражат ізде­ген кезімді есіме алсам, жүрегім ауы­рады. Себебі қандай банкке барсам да, ешқайсысы қаражат бер­меді. Кейбі­реу­лері істің тәуекел­ді­гі­не немесе ке­піл­діктің банк сая­са­тына сәйкес кел­меуіне сілтеме жа­сап отырды. Осыдан кейін банк­тер­ге бармайтын болдым, – деп сөзін одан әрі сабақтады. Кейін, Абдрахим Абдрахманұлы өз танысынан “Ауыл шаруашы­лы­ғын қаржылай қолдау қоры” акцио­нерлік қоғамы туралы естіп, сол жерден шаруасын ашып, кәсібіне керекті қаражатты тапты. – Қордың қызметкерлері мені жы­­лы қарсы алып, несие алуыма кө­мек­тесіп қана қоймай, бизнес-жос­па­рымдағы кейбір кемшілік­те­рімді тү­зетуге көмектесті, қолда­рынан келетін көмектерін көрсетті, – деген оның жүзінен қуаныш шуағы шашады. Қазір Қуанышбаев жылыжайдан басқа, жүзім және өзі салған су қой­масында балық өсірумен айналысады. – Көкөніс қоймасын құру да жос­па­рымда бар. Кейбір құрылыс ма­те­ри­алдарын өз қаражатыма алдын ала алып қойған едім, ал жетпей­тінін қай­та­дан “Ауыл шаруашы­лығын қар­жы­лай қолдау қоры” АҚ арқылы ала­мын, – дейді Абдрахим Абдрахманұлы. Осыған қарап, адамның өз өмірін жақсартуға ынтасы болғанда ғана, барлық кедергіні жеңеді деп айт­қымыз келеді.