Міржақып маркасы

Бұл жайды өткен барыс жы­лының мәдени саладағы бір табысы ретінде бағалауға болар. Жаңа жылдың қарсаңында еліміз бойынша Алаштың бір арысы Міржақып Дулатовтың туғанына 125 жыл толуына орай арнайы марка пошта айналымына енгізілді. «Атаулы және мүшелтой күн­дері» сериясымен шығарыл­ған жарқын бейнелі марканы пош­та айналымына қосудың салтанатты рәсімі Алматыдағы Ұлттық кітапханада өткізілді. ХХ ғасырдың басында қазақ қауымында «Ахаң мен Жақаң» деп ардақталған, бір-бірінен бө­лініп айтылмас қос алыптың бірі ұлт ұстазы Ахмет Байтұрсынов болса, екіншісі Алаш қозғалы­сы­ның  көр­некті қайраткері, атақты «Қазақ» газетін шығару­шылардың бірі, қа­зақ мәдениеті мен әдебиетінің ірі өкілі, ақын, жазушы, публицист, ағартушы-педагог Міржақып Дулатов еді. Ол – Әлихан Бөкей­ханов­пен және Ахмет Байтұрсыновпен қатар сол алмағайып заманда қа­зақ­тардың ұлттық санасын ояту ісіне өл­шеу­сіз үлес қосқан алғашқы үштіктің ішінде аталатын жан. «Оян, қазақ!» деп дабыл қаққан оның шығарма­шы­лығы поляктың ұлт-азаттық қозға­лысы идеясын жыр­­лаған Адам Мицкевичпен, дека­брис­тердің ерлігіне тәнті бол­ған Пушкинмен, қо­ғамның әлеу­мет­­тік кеселін ашып көр­сеткен Лев Толстоймен, «ақсүйек­­тердің» пікіріне ашық қарсы шық­қан Михаил Лермонтовпен үндес делінеді. Ре­сей­дің белгілі шығыс­тану­шысы Гордлевскийдің М.Ду­латовты заман шындығының әлеу­метт­ік қыр­­тыстарын ашып көрсету дең­гейі жөнінен Абаймен салыс­тыруы да тегін емес. Тәуелсіздіктің арқасында қазір мұрағаттармен еркін жұмыс істеледі. «Құпия» деген белгісі бар істерге жол ашылды. Міржақып Дулатов мүше болған Алашор­даның қызметіне байланысты ақтаң­дақтар қалпына келтірілуде. Тәуелсіз Қазақстанның қазіргі жас ұрпағы Алаш арыстарымен, сол бір арыстан аталарымен қауышты. «Алаштың» тоқсан жылдығын ел жұртшылығы 2008 жылы кеңінен атап өтті. Міржақып маркасы Алаш арыстарының ел-жұртымен мәң­гі­лікке табысқандығының тағы бір айғағы болды. 300 мың дана таралыммен шығарылып, төрт түрлі бояумен басылған марка­ның суретшісі – Данияр Мұха­меджанов. Марканы таныстыру рәсіміне Міржақыптың немересі, «Мектеп» баспасының бас дирек­торы Ерлан Сатыбалдиев, М.Әуезов атындағы Әдебиет инсти­туты директорының орынбасары Серікқазы Қорабай, «Қазпошта» АҚ басқарма төрағасының орын­басары Мұхтар Әбдірах­манов қатысты. Ардақты арыс Жақаңның мар­ка­сы бір заманда өзі азаттығын аңсаған, тәуелсіздігі үшін күрес­кен туған елінің ауыл-аймағын, кент-қалаларын армансыз аралай­тын ақ жолды сапарын бастады. «Егемен-ақпарат».