Қызылорда облысында «Әлеуметтік салаға бағытталған бюджет қаражатын тиімді пайдалану» атты республикалық семинар-кеңес өтті. Іс-шараға 300-ден астам орталық және жергілікті мемлекеттік орган өкілдері, облыс әкімдерінің орынбасарлары, сондай-ақ әлеуметтік саясат пен қаржы саласындағы сарапшылар қатысты.
Пленарлық отырысты Премьер-министрдің орынбасары Ермек Көшербаев ашты. Ол оңтайландырудың басты мақсаты – әлеуметтік көмектің атаулылығын әрі әділдігін қамтамасыз ету екенін атап өтті.
«Мемлекет әлеуметтік салаға айрықша назар аударуды жалғастыруда, республикалық бюджеттің 40%-дан астамы дәстүрлі түрде азаматтарды қолдауға бағытталады. Маңыздысы – мемлекеттік қолдау шынымен мұқтаж жандарға жетуге тиіс», деді вице-премьер.
Семинар-кеңес барысында Жоғары аудиторлық палата мен салалық министрліктер анықтаған әлеуметтік төлемдерді мақсатсыз пайдалану фактілері қаралды. Ол: заңды негізі жоқ азаматтардың жәрдемақы алуы, жұмыссыздық пен декреттік төлемдерді тағайындау кезіндегі алаяқтық жағдайлары, бірыңғай жинақтаушы зейнетақы қоры қаражатын стоматологиялық қызметтерге мақсатсыз пайдалану, мектептегі тамақтандыру мен атаулы әлеуметтік көмек тағайындауда жағдайы бар отбасыларға жеңілдіктер беру.
Еңбек және халықты әлеуметтік қорғау министрлігінің дерегінше, 2025 жылғы 1 тамыздағы жағдай бойынша 429 мың жұмыссыз азамат тіркелген. Жұмыссыздық бойынша жәрдемақы төлеуге Мемлекеттік әлеуметтік сақтандыру қорында 127 млрд теңге қарастырылған. Алайда бұл көмекті іс жүзінде мұқтаж емес адамдар да алған жағдай анықталған.
«Конституция кепілдік берген барлық әлеуметтік төлемдер азаматтарға толық көлемде әрі қысқартусыз төленеді. Оңтайландыру тек қана теріс пайдалану жағдайларын жоюға және әлеуметтік көмектің атаулылығын арттыруға бағытталған. Үнемделген қаражат шын мәнінде мұқтаж азаматтарға қолдауды күшейтуге мүмкіндік береді», деді Ермек Көшербаев.
Вице-премьер әлеуметтік шығыстарды оңтайландыру бағытында Қызылорда облысы үлкен жұмыс жүргізгенін атап айтты. Өңірде жекеменшік балабақша мен мектепті қаржыландыруға, «Артспорт» бағдарламасына, гранттарға және басқа да бағытқа бөлінген қаражатқа кешенді талдау жасалды. Нәтижесінде, тиімсіз шығыстар анықталып, шамамен 100 млрд теңге үнемделді. Үнемделген қаражат өңірдің әлеуметтік инфрақұрылымын дамыту мен аз қамтылған отбасыларды қолдау сияқты басым міндеттерге бағытталды. Облыс әкімі Нұрлыбек Нәлібаев бұл тәжірибені елдің басқа өңірлерінде де қолдануға болатынын айтты. Семинарға қатысушылар Қызылорда облысының үздік тәжірибелерін жергілікті бюджет ерекшеліктері мен халықтың әлеуметтік қажеттіліктерін ескере отырып бейімдеуге дайын екенін білдірді.
Еңбек және халықты әлеуметтік қорғау министрі Светлана Жақыпова: «Басты мақсатымыз – әлеуметтік қорғау жүйесін әділетті әрі тиімді ету. Өткен жылы әлеуметтік салаға 6,1 трлн теңгеден астам қаржы бөлінді, бұл қаражат барынша нәтижелі жұмыс істеп, шынымен қиын жағдайдағы отбасыларға көмек болып жетуге тиіс», деді.
Семинар қорытындысында қатысушыларға халық арасында түсіндіру жұмыстарын күшейту, әсіресе конституциялық тұрғыдан кепілдік берілген әлеуметтік төлемдердің өзгермейтіні және бюджет қаражатының әділ бөлінуі туралы ақпаратты жеткізу тапсырылды.