Ресейдің «МИФИ» Ұлттық ядролық зерттеу университеті ректоры Владимир Шевченконың айтуынша, Қазақстан ядролық энергетика және жоғары білікті мамандар даярлау саласында өз ұстанымын бірізді түрде нығайтып келеді, деп хабарлайды Egemen.kz.
Оның сөзінше, Қазақстан бүгінде жаһандық атом нарығының маңызды қатысушысы саналады, уран өндіру көлемі бойынша әлемде бірінші, ал қоры жөнінен екінші орында тұр. Бұл көрсеткіштер атом саласында ұлттық ғылыми-технологиялық әлеуетті қалыптастыруға стратегиялық алғышарттар жасайды.
МИФИ филиалы 2022 жылдан бері Әл-Фараби атындағы Қазақ ұлттық университеті базасында жұмыс істейді. Ол Қазақстан Республикасының Президенті тапсырмасымен ашылған. Мұнда мамандар мына бағыттар бойынша дайындалады: ядролық энергетика, радиациялық қауіпсіздік және қолданбалы физика.
Оқыту үдерісіне МИФИ-дің 23 оқытушысы тартылған. Студенттер атом өнеркәсібі кәсіпорындарында тәжірибеден өтіп, Мәскеуде тағылымдамадан өтеді.
«Қазақстан ядролық құзыреттерді дамытуда жүйелі тәсілді ұстанып отыр. Елде білім беру, ғылым және өндіріс өзара байланыста дамып келеді», – деді Владимир Шевченко.
Қазіргі уақытта филиалда 125 студент пен 39 магистрант білім алуда. Жоғары өнімді есептеу жүйелері саласы бойынша алғашқы түлектер оқуын аяқтап, олардың басым бөлігі Қазақстанда жұмысқа орналасқан.
МИФИ ректорының айтуынша, бұл көрсеткіштер ядролық сала мамандарына деген жоғары сұраныс пен іске асырылып жатқан білім беру бағдарламаларының тиімділігін дәлелдейді.
Алматыдағы МИФИ филиалының дамуы жаңа ядролық энергетика үшін кадрлық әлеует қалыптастыру және елдің технологиялық қауіпсіздігін нығайту ісінде Қазақстан стратегиясының маңызды бөлігі болып отыр.