Нью-Джерси штатының оңтүстігінде екі тікұшақ соқтығысып қалды. Оқиға салдарынан бір адам қаза тапты, біреуі жарақат алды, деп хабарлайды Egemen.kz CNN-ге сілтеме жасап.
Оқиға шамамен таңғы 11:25-те Хаммонтон муниципалдық әуежайының маңында болған. Әуеде Enstrom F-28A және Enstrom 280C үлгісіндегі тікұшақтар соқтығысқан. Екі тікұшақтың бортында тек ұшқыштар болған.
Зардап шеккендер ауыр жарақаттармен травматологиялық орталыққа жеткізілді.
Әуежайдағы мейрамхананың иесі Сал Силипиноның айтуынша, екі ұшқыш та оның тұрақты тұтынушылары болған және ұшар алдында бірнеше минут бұрын ғана таңғы ас ішкен.
АҚШ-тың Ұлттық көлік қауіпсіздігі кеңесі апатқа байланысты тергеуді бастады. Кеңес өкілдері ұшу траекториясы мен әуе кемелерінің техникалық жағдайы туралы деректер жинау үшін тергеушіні оқиға орнына жіберген.
«Сынықтар құжатталғаннан кейін екі тікұшақ та әрі қарай зерттеу жүргізу үшін күзетілетін орынға көшіріледі», деп мәлімдеді Ұлттық көлік қауіпсіздігі кеңесі.
Хаммонтон қаласының өрт сөндіру қызметі куәгерлерді жедел қызметтердің жұмысы аяқталғанға дейін оқиға орнына жақындамауға шақырды.