Премьер-министрдің бірінші орынбасары Роман Склярдың төрағалығымен Энергетика министрлігінің кеңейтілген алқа отырысы өтті. Оған Президент Әкімшілігі, Үкімет аппараты өкілдері, Парламент депутаттары, Энергетика министрлігінің басшылығы, ұлттық компаниялар мен ведомстволық бағынысты ұйымдар қатысты.
Роман Скляр өз сөзінде алдағы республикалық референдум мемлекеттік даму негіздерін жаңартудың маңызды кезеңін белгілейтінін атап өтті. Кең қоғамдық пікірталас барысында қалыптасқан негізгі заң жобасы мемлекеттік институттардың жауапкершілігінің жоғары стандарттарын белгілейді.
«Энергетикалық қауіпсіздік және табиғи ресурстарды ұтымды пайдалану салалық міндеттерге ғана емес, сонымен қатар ел дамуының жаңа конституциялық моделінің элементтеріне айналып келеді. Бұл жағдайда негізінен шикізат моделінен терең өңдеуге және жоғары қосылған құнды құруға көшу қажет», деді Р.Скляр.
Роман Скляр энергетика және мұнай-газ саласындағы жұмыстың басым бағыттарын белгіледі. Негізгі міндеттер – геологиялық барлауды дамыту, көмірсутектердің ресурстық базасын толықтыру, отандық құрамның үлесін ұлғайту, сондай-ақ мұнай өңдеуді күшейту. Осыған байланысты жаңа мұнай өңдеу зауыты (МӨЗ) құрылысының техникалық-экономикалық негіздемесін әзірлеуге және жұмыс істеп тұрған зауыттарды кеңейтуге кірісу міндеттелді.
Атырау облысында полиэтилен зауытын салу, Павлодарда алкилат өндіру жөніндегі жобалар, сондай-ақ қайта өңдеу мен энергетикалық тәуелсіздіктің орнықты өсуін қамтамасыз ету үшін «Мұнай-газ-химия өнеркәсібі туралы» заң жобасын қабылдау ерекше бақылауда тұр.
Энергиялық ресурстарға артып келе жатқан сұранысты жабу мақсатында биыл қуаттылығы 1 млрд текше метр болатын Қашағандағы МӨЗ-ді іске қосу, Жаңаөзендегі МӨЗ құрылысын 2027 жылдың соңына дейін аяқтау және «Бейнеу – Бозой – Шымкент» газ құбырының екінші желісінің жүзеге асырылуын қадағалау міндеті қойылды.
Сондай-ақ Түркістандағы бу-газ қондырғысы жобаларын аяқтауды, Алматыдағы ЖЭО-2 мен ЖЭО-3-ті жаңғыртуды, сондай-ақ Батыс энергетикалық аймағын елдің бірыңғай электр энергетикалық жүйесімен біріктіруді қоса алғанда, жаңа генерациялаушы қуаттарды жедел енгізуге және жұмыс істеп тұрған стансаларды жаңғыртуға баса назар аударылды.
Көмір генерациясын дамыту, энергия нысандарының цифрлық егіздерін енгізу арқылы саланы трансформациялау, мұнай базаларын мұнай өнімдерінің көлеңкелі айналымын болдырмау мақсатында бірыңғай жүйеге интеграциялай отырып, есептеу аспаптарымен жарақтандыру жөніндегі Ұлттық жобаға ерекше мән берілді.
Жиынды қорытындылай келе Роман Скляр Энергетика министрлігі күш-жігерді елдің энергетикалық тәуелсіздігін қамтамасыз етуге, инвестициялық жобалардың жүзеге асырылуын қатаң бақылау қажеттілігіне жұмылдыруы қажет екенін атап өтті. Өйткені отын-энергетикалық кешенді дамыту – мемлекеттің жаңа экономикалық үлгісінің негізі саналады.