2025-2026 жылдардағы жылыту кезеңінің қорытындысы еліміздің тұрғын үй секторында өрттер мен зардап шеккендер санының азайғанын көрсетті. Оң динамика Төтенше жағдайлар министрлігі мен жергілікті атқарушы органдардың бірлескен жүйелі профилактикалық жұмысының нәтижесінде болды, деп жазады Egemen.kz.
Жылыту маусымы барысында тұрғын үй секторында 3359 өрт тіркеліп, бұл өткен жылмен салыстырғанда 16%-ға төмендеді. Өрт салдарынан жарақат алғандар саны да айтарлықтай қысқарып, 173-тен 125 адамға дейін азайды (-28%). Ал қаза тапқандар саны 181-ден 175 адамға дейін төмендеп, 3,3%-ды құрады.
Сонымен қатар пешті пайдалану ережелерін бұзу салдарынан улы газбен улану жағдайлары да азайған. Мұндай оқиғалардан 28 адам көз жұмды, бұл өткен жылмен салыстырғанда 17%-ға аз. Зардап шеккендер саны 12%-ға төмендеп, 104 адамды құрады.
Жылыту кезеңіне дайындық жұмыстары алдын ала басталған. Өртке қарсы қызмет комитеті өткен маусым тәжірибесін ескере отырып, профилактикалық шаралар жоспарын әзірледі. Бұл жұмыстар 2025 жылғы 15 тамыздан бастап жүргізіліп, жылыту маусымы бойы жалғасты.
Астанада төрт қабатты ғимарат өртенді
Төтенше жағдайлар министрлігінің мәліметінше, әсіресе әлеуметтік осал топтарға ерекше назар аударылды. Нақты айтқанда, 108 мыңнан астам тұрғын үй мен 225 мыңнан астам көпбалалы отбасы есепке алынды. Аулаларды аралау барысында 1,8 млн тұрғын үй қамтылып, 5,7 млн азаматқа түсіндіру жұмыстары жүргізілді.
Тексеру нәтижесінде 500 мыңға жуық өрт қауіпсіздігі талаптарының бұзылуы анықталып, олардың басым бөлігі сол жерде жойылды. Бұдан бөлек, қауіпті факторларды ерте анықтау үшін 51 мыңнан астам арнайы датчик орнатылды. Бұл құрылғылар газ бен жану өнімдерінің қауіпті деңгейін анықтауға мүмкіндік береді.
Түркістанда көпқабатты тұрғын үй жанындағы дүкен өртенді