Қазақстан негізгі серіктес және инвестор

Кеше Ақордада Мемлекет басшысы Нұрсұлтан Назарбаев Қырғыз Республикасының Премьер-министрі Алмазбек Атамбаевты қабылдады, деп хабарлады Қазақстан Респуб­ликасы Президентінің баспасөз қызметі. Кездесу барысында екі жақты ынтымақтастықты дамытудың кең ауқымды мәселелері талқыланды. Қырғызстан Премьер-министрі Нұрсұлтан Назарбаевтың Қыр­ғыз­стандағы ахуалды тұрақтан­дыру үдерісіндегі рөлін жоғары бағалады және қырғыз халқы үшін қиын кезеңдерде Қазақстан тарапынан көрсетілген қолдауға ризашылығын білдірді. Жалпы, 20 миллион доллардан астам гу­манитарлық көмек көрсетілген. Сондай-ақ, А.Атамбаев Қыр­ғыз­стан үшін Қазақстан негізгі се­ріктес және инвестор болып та­былатынын атап өтті. 2010 жылы мемлекеттер арасындағы сауда ай­налымының көлемі 500 миллионнан астам долларды құраған. Таяу уақытта Бішкекте қазақ­стандық бизнесмендердің қаты­суы­мен халықаралық экономи­ка­лық форум өткізу жоспарлануда. Форум­да қырғыз экономикасын қалпына кел­ті­рудің және дамы­тудың өзекті про­блемалары тал­қыланатын болады. Қырғызстан Премьер-министрі өз елінде қазақстандық ин­вестицияны сенімді қорғауға мүм­кіндік туғызатын қажетті шаралар қабылданатынына тоқталып өтті. Қазіргі уақытта Қырғызстанда қазақстандық капиталдың қаты­суы­­мен банк секторында, энер­ге­тика, газ тасымалдау салала­рын­да, өнеркәсіп, құрылыс ма­те­риалдары өндірісінде 400-ден астам бірлескен кәсіпорын жұмыс істейді. Қазақстанда қырғыздардың қа­тысуымен сауда, туризм, құры­лыс, көлік салаларында 250 компания жұмыс істейді. ––––––––––––––– Суретті түсіргендер С.БОНДАРЕНКО, Б.ОТАРБАЕВ.