"Барыс" плей-офф кезеңінің келесі раундына шықты

Құрылықтық хоккей лигасының плей-офф кезеңінде Астананың "Барысы" Челябінің "Трактор" командасын қабылдап, 2:1 есебімен басым түсті. Қос команда осымен алтыншы кездесуін өткізді. Жанкүйерлер тартысты ойынның куәсі болды. Қос ұжым матч бастала сала алма кезек қауіпті шабуылдарымен көзге түсіп жатты. Кездесудің 10-минутында айдын иелерінің бір ойыншысы кемдігін тиімді пайдаланған "Трактор" Кирилл Кольцовтың көмегімен есепте алға шықты. Үзілісте бас бапкер Эдуард Занковецтен жаңа нұсқаулар алған "Барыс" ойыншылары екінші кезең бастала сала алға ұмтылды. Нәтижесінде,23-минутта Владимир Маркелов таразы басын теңестірді. Ал соңғы 20 минутта жерлестеріміздің мерейі үстем болды. 43-минутта команданың бас жұлдыздарының бірі Дастин Бойд жеңісті голдың авторы атанды. Қос ұжым осыдан кейін де таблодағы есепті өзгертетін бірнеше мүмкіндіктері болған, бірақ сәттілік жолдас бола қоймады. Осылайша, алты матчта "Барыс" 4:2 есебімен келесі раундқа жолдама алды. Құрлықтық хоккей лигасы плей-офф кезеңінің ширек финалында елордалықтар Қытайдың "Кун Лунь Ред Стар" командасын жеңген Магнитогорскінің "Металлургімен" күш сынасатын болады.