Фристайлдың хас шебері Юлия Галышеваға артылар үміт көп

Фристайл шебері Юлия Галы­шеваны білмейтіндер бүгінде кемде-кем. 1992 жылы туған өске­мендік қаршадай қыз шаңғыны шырқ үйіріп қана қоймай, онымен әуеде айналатын күрделі спорт түрі бойынша еліміздің ұлттық құрамасының белді мүшесі, халықаралық дәрежедегі спорт шебері. Алматыда өтетін қысқы Уни­вер­сиадамыздағы негізгі үміт­­кер­­леріміздің бірі де – Юлия Галышева. Есімі елге елеулі спортшы бүгінде ұлттық құрама жаттықтырушысы Елена Круглыхинда жаттығып жүр. Туған елінің туын көтеруді мақсат еткен ол осы күндері Ал­маты Универсиадасына жан-жақты даярлық жүргізуде. Бұдан кейін 19-26 ақпанда Жапонияның Саппоро қаласында VIII қысқы Азия ойындарына қатыспақ. Ал 6-19 нау­рызда Испанияның Сиера-Невада қаласында жалауын көтеретін әлем біріншілігінде бағын сынайды. Бұдан басқа бұл маусымда халықаралық федерацияның (FIS) күнтізбелік жоспарына сай Әлем кубогының кезеңдері мен ел чемпио­наты бар. Әрине, мұның барлығы спортшы үшін аз жауап­кершілік емес. Еуропаның екі дүркін чемпио­ны, Ванкувердегі Олимпия ойындарында могулден 11-орынға табан тіреген, Сочидегі Олим­пиадада үздік жетілікке енген, Әлем және Еуропа кубоктарының иегері, қысқы Азия ойындарының абсолютті чемпионы сияқты атан түйеге жүк боларлық атақ-абыройы бар спортшыға артылар сенім жоғары екені даусыз. Әлемдегі үздік фристайлшылар сапына енген оның қазір нағыз кемеліне келген шағы. Ал спорттағы жетістіктерінің тағы бір парасына көз жүгіртер болсақ, 2011 жылы Финляндияда 18-20 жас арасындағы спортшылар арасында әлем чемпионы атанған. Дәл осы жастағылар арасында 2012 жылы Италияның Валмаленко қаласында өткен әлем біріншілігінде могулден алтын медаль алса, параллелді могул бойынша қола медальға қол жеткізді. 2015 жылы Испанияда өткен Бүкіл­әлемдік Универсиаданың жеңім­пазы атанды. Сондықтан, Юлия Галышеваның мәртебелі жарыс­тар мен өз қатарластарымен бәсе­келерде жинаған тәжірибесі жет­кілікті. Биылғы маусымда Әлем кубогының тұғырына екі мәр­те көтеріліп, күміс пен қола­ны ен­шілегені мәлім. «Бұғылар жазығы» атанған америкалық Дир-Вэллиде өткен жарыста канадалық Жюстин Дю­фур-Лапуантқа екі рет есе жібе­ріп, күмістен екі мәрте алқа тақты. Юлия бұған дейін фристайл тарихында еш спортшы жасай алмаған жаңа сальто әдісімен әріп­тестерін де, жанкүйерлерін де таңғалдырып жүр. Думан АНАШ, «Егемен Қазақстан» Шығыс Қазақстан облысы