Кеште балет көрермендері Эдит Пиафтың әндерінің әуенімен қойылған «Love fear loss» балетін, А.Вивальди, С.Рахманинов, Ш.Гуно, К.Сен-Санс сынды даңқты композиторлардың музыкасымен Рикардо Амарантенің «Diversity» спектаклінен үзінділер тамашалады.
Балет әртістері театрда тұңғыш рет Сергей Рахманиновтың «Фортепияно мен оркестрге арналған №2 концерт» шығармасына қойылған балетті ұсынды. Орыстың атақты композиторы Сергей Рахманинов әрі пианист, әрі дирижер болғаны белгілі. Өнер зерттеушілері оның фортепияноға арналған аталмыш туындысының 1900 жылы өмірге келгенін айтады.
Ал, «Қиялға бойлау» балетіне келер болсақ, қоюшы-режиссер Рикардо Амаранте оның қойылуына С.Рахманиновтың «Фортепияно мен оркестрге арналған №2 концерті» себепкер болғанын айтады. – Бұл ең үздік музыкалық шығармалардың бірі. Оның дүниеге келу тарихы да мені қызықтырды. Депрессияға түскен композитор шығарманы өзінің психотерапевт-дәрігері Николай Дальге алғыс ретінде шығарған. Бұл маған қатты әсер етті, – деді Рикардо Амаранте журналистерге берген сұхбатында.
«Қиялға бойлау» деген атына сәйкес балет кеші көрермендерді түрлі сезімдер мен көңіл-күйге жетеледі. Адам бойындағы әдемілікті сезіну, өмірді сүю, тылсым дүниенің жұмбағына бойлау сынды сезімдер балет кешімен үндесіп жатты.
Балет кешін танымал шығармашылық иелерінен құралған топ өткізді. Қоюшы-режиссер әрі хореограф Рикардо Амаранте, костюм суретшісі Рене Салазар. Спектакльді симфониялық оркестр сүйемелдеді, солист Қазақстанның еңбек сіңірген қайраткері Әмір Тебенихин, ал, дирижері Арман Оразғалиев.
Айгүл СЕЙІЛ,
«Егемен Қазақстан»
