Қазақстан құрамасы «С» тобына түсті. Қарсыластарымыз – Словения, Босния мен Герцеговина және Литва футболшылары. Бұл бәсекелер 10-15 мамыр аралығында Балтық жағалауында өтеді. «А» тобында Нидерланд, Сербия, Солтүстік Ирландия және Латвия күш сынасса, «D» тобында Бельгия, Словакия, Гибралтар және Молдова шеберлік байқасады. Әр төрттікте топ жарған командалар келесі жылдың қаңтар айында шымылдығы түрілетін іріктеу турнирінің негізгі бөлігіне жолдама алады. Ал сол сынақтан сүрінбей өткендері қарт құрлықтың ең үздік командалары бас қосқан байрақты бәсекеде өнер көрсету мүмкіндігіне ие болады.
Естеріңізге сала кетейік, соңғы Еуропа чемпионаты 2017 жылы Нидерландта өткен болатын. Финалда алаң иелері Дания құрамасын 4:2 есебімен ұтып, алтыннан алқа тақты.
