Өткен жылы 4 922,8 мың тонна астық экспортталды

Президент жанындағы Ор­та­лық коммуникациялар қызме­тінде кезекті брифинг өтті. Басқо­суға «Азық-түлік корпорация­сы» ҰК» АҚ басқарушы дирек­торы-коммерциялық директоры Нұрбек Дайырбеков, Корпо­рацияның басқарушы дирек­торы-Астық ресурстарын бас­қару департаментінің директоры Сәбит Қашқымбаев, Ауыл шаруашылығы министрлігі Егін шаруашылығы өнімдерін өңдеу және фитосанитарлық қауіпсіздік департаменті директорының міндетін атқарушы Бақыт Ілиясов және АШМ Агроөнеркәсіптік кешендегі мемлекеттік инспекция басқармасының басшысы Арман Абдуллин қатысты. Ең көп астық Ресей (990,7 мың тонна), Әзербайжан (927,5 мың тонна), Өзбекстан (737,4 мың тонна) және Тәжікстан (651,7 мың тонна) мемлекеттеріне жеткізілді. Осы елдер қазақстандық астықтың дәстүрлі импорттаушылары екенін атап өту қажет. Бүгінгі таң­да министрлік астық, бұршақ жә­не майлы дақылдар экспортын Оң­түстік-Шығыс Азия елдері, Қытай бағытында ұлғайту шараларын жасауда. Астық бойынша халықаралық кеңестің мәліметіне сай Қытайға жыл сайынғы астық импорты 3 миллион­нан 8 миллион тоннаға дейін жетеді. Бұл Қытайға және сол елдің аумағы арқылы ОША мемлекеттеріне қазақстандық астықтың жөнелту көлемін ұлғайту, экспорттық нарықты кеңейту стратегиялық бағыт болып саналады. Қолайлы географиялық орналасу мен Қытаймен ортақ шекараның арқасында Қазақстан-Қытай шекарасында астық терминалының құрылысы жоспарланған. Бұл Қытай мен ОША мемлекеттеріне қазақстандық астықтың үздіксіз жеткізілуін қамтамасыз етеді. Қа­зақ­стандық астық экспортын ұлғай­ту мақсатында КО қызмет ету шеңберінде фитосанитарлық талаптарды жеңілдетуге бағытталған шаралар жүргізілуде. Кеден одағы шеңберіндегі интеграция өсімдіктер карантині саласында Беларусь Республикасы мен Ресей Федерациясының фито­санитарлық талаптарын жеңіл­детуге мүмкіндік берген. Атап айтқанда, Кеден одағы комис­сиясының шешімімен 2010 жылы 18 маусымда жоғары және төменгі қауіптерге бөлінген карантинге жатқызылған өнімдердің бірыңғай тізбесі, Кеден одағының кеден шекарасында және кеден аумағында карантиндік фитосанитарлық бақылау (қадағалау) жүргізу тәр­тібі туралы ережелер бекітілген. Карантиндік фитосанитарлық қауіп төндірмейтін өнімдер тіз­беден шығарылып, карантиндік өнімдер тізбесі оңтайландырылған. Төмен карантиндік фито­са­ни­тарлық қауіпке жататын каран­тинге жатқызылған өнімдерді фито­санитарлық сертификатпен шы­ғару талаптары алынса, 2011 жылғы 15 наурыздағы Еура­зиялық экономикалық қоғам­дастықтың Мемлекетаралық кеңе­сінің шешімімен, 2011 жылдың 1 шілдесінен бастап Қазақстан-Ресей шекарасындағы карантиндік фитосанитарлық бақылау Кеден одағының сыртқы шекарасына ауыстырылған. Сондай-ақ, 2011 жылғы 19 мамырда аталған кеңестің шешіміне сәйкес Кеден одағына мүше мемлекеттер арасында карантинге жатқызылған өнімдерді алып жүруге және әкелуге импорттық карантиндік рұқсат алу тоқтатылған. Аталған шаралар өсімдіктер карантиніне жатқызылған өнім­дерді Кеден одағына мүше мемлекеттер арасында тасымалдау кезінде, сонымен қатар үшінші елдерден осындай өнімдерді импорттау кезінде бірқатар кедергілерді жою мәселелерін, сонымен қа­тар карантинге жатқызылған өнім­дерді Кеден одағына мүше мемлекеттер арасында әкелу және та­сымалдауға қатысты карантиндік фитосанитарлық бақылау кезінде бірегейлікті анықтау мен реттеуді қамтамасыз еткен. Әбдірахман ҚЫДЫРБЕК, «Егемен Қазақстан».