Ұлттық бірыңғай тестілеу соңғы рет өткізіліп отырған жоқ

АСТАНА. 2 маусым. Жыл сайын еліміз бойынша өткізіліп келе жатқан ұлттық бірыңғай тестілеу келер жылдан бастап тоқтатылады деген қауесет жоққа шығарылды. Бұл туралы «ҚазАқпарат» хабарлады. Бүгiн Астанадағы Л.Гумилев атындағы Еуразия ұлттық университетiндегі сынақ пункттерiнiң бiрiне келген Бiлiм және ғылым министрінің орынбасары Тахир Балықбаев ұлттық бірыңғай тестілеу соңғы рет ұйымдастырылып отыр деген ақпаратты теріске шығарды. Тахир Балықбаев: «Биыл ұлттық бірыңғай тестілеу соңғы рет өткiзiлiп жатыр деген ақпарат жалған. Келесi жылы да сынақ осы форматта өтеді. Бiрақ бiзде мемлекеттiк бiлiм беру жүйесiн дамытудың 2020 жылға арналған бағдарламасында 2015 жылдан кейiн мектеп бiтiрген оқушылардың емтихандарына өзгерiс енгiзу көзделген. Оны қазiр комиссия талқылап жатыр», – деді. Естеріңізге сала отырайық, бүгін жұртымызда мектеп түлектерi арасында ұлттық бiрыңғай тестiлеудің алғашқы күні басталды. Жолдыбай Базар. Дереккөз: «ҚазАқпарат». Фото: «ҚазАқпарат».