85 жасында Еуропаның бас жүлдесін иеленді

Тарихқа көз жүгіртсек жасы ұлғайса да өзінің жас кезіндегі қарым-қабілетін жоғалтпаған айрықша жандар жөніндегі деректерге тап боламыз. Ал жасы сексеннің бесеуіне қараған оралдық ақсақал Дәржан Иманғалиевтің жөні тіптен бөлек. Бұл кісінің саналы ғұмыры бизнес деген ұғым мен түсінік тілдік қорымызға дендеп кіре қоймаған сонау кеңестік кезеңде өткізілген. Ол сол уақытта обкомның қаржы-шаруашылық бөлімін басқарған.

Дәкең мұнда ұзақ жылдар бойы абыроймен еңбек етіп, құрметті еңбек демалысына шыққан кезде социалистік қоғамы­ның шегелері былқылдап, босай бастаған болатын. Өзі­нің күш-қайраты және ерік-жігерінің молдығымен талайларды таңғалдырып келген ел ағасы, әрине, қарап жата алмады. Сөй­тіп, кеңес дәуірінің өзінде бизнеске білек сыбана кірісіп кет­­­ті. Бұл кезде қоғамда банкіден несиелік қаражаттар алып, оған құ­рылыс нысандарын салу ісіне мүлдем түрен түспеген еді. Міне, алпыстан асқан шағында, сонау 90-жылдардың бас кезінде Д.Иманғалиев республикада алғашқылардың бірі болып, осындай тың қадамға баруға бекем бел буды. Көз қорқақ, қол батыр дегендей, көп кешікпей қолға алған ісін бастап та кетті. Тағы бір сүйсінерлік жайт, жаңалықты жатсынбаған дара қасиет иесі Дәржан Тілешұлының бастамасымен тұрғызылған еңселі ғимараттар мен нысандар Орал қаласынынң архитектуралық ажарына айрықша үлес қосты. Әуел баста берік негіз қаланса – бизнес қашанда табыс­ты­ жүретініне, тоқтап, тоқырап қалмайтынына 85-ке келген Ақ­жайық­тың аса сыйлы, абыройлы ақсақалы Дәржан Иманға­лиев жетекшілік жасайтын кәсіпорынның тыныс-тіршілігі арқылы да көз жеткізе аламыз. Ол бүгінде өз бизнесінің 25 жыл­дық асуын атап өтуге қам жасап отыр. Ең бастысы, мұнда адам­дар тұрақты жұмыспен қамтылған. Серкітестіктегі табыс көздері­нің жылдан-жылға өсе түсуі олардың берік сенімдерін орнықтырған. Сексеннің сеңгірінен әлдеқашан асып кетсе де, бизнестің құпия сырларына үңілуден танбаған ел ақсақалы таяуда халықаралық марапатқа да ие болды. Оған сонау Швейцариядан сапа үшін белгіленген Еуропаның бас жүлдесі жеткізілді. Өткен мамыр айында Ақжайықтың ақсақал бизнесмені Женевадан шақыру алған болатын. Өкінішке қарай, ол бұл сапарға денсаулығына байланыс­ты бара алмады. Содан кейін аталған халықаралық марапатты тағайындағандар оны Қазақстанға, оның иесіне жеткізіп берді. Аталған халықаралық марапаттың қыр-сырына тереңірек тоқталсақ, Швейцарияның француз тілді кәсіпкерлер федера­циясының өнеркәсіп және технологиялар агенттігі 2014 жылғы 26 мамырдағы шешімімен «Шағын бизнес кәсіпорнын табыс­ты басқару» атты аталымындағы халықаралық конкурстың қорытындысын шығарған. Соған сәйкес аталған агенттік 85 жастағы қазақстандық кәсіпкер Дәржан Иманғалиев пен ол басқаратын «Тілеш» ЖШС-ін жеңімпаз деп тауыпты. Бұл сөз жоқ, жоғарғы айтып өткеніміздей жасы ұлғайса да ізденісін тоқтатпаған, өз бойындағы қарым-қабілетін жоғалтпаған Орал өңіріндегі шағын бизнес өкілі үшін үлкен абырой, биік мәртебе, әрі өз уақытына жетпей шау тартып қалғандар үшін үлгі-өнеге екені анық. Сондықтан да, біз бүгін осы жағымды жаңа­лық­ты газет оқырмандарының назарына ұсынғанды жөн көрдік. Темір ҚҰСАЙЫН, «Егемен Қазақстан». Батыс Қазақстан облысы.