Көңіл толқытқан кездесу

Кеше «Невада-Семей» ядролық жарылысқа қарсы халықаралық қозғалыс – қоғамдық-саяси ұйым төрағасының орынбасары Сұлтан Картоев «Егеменде» қонақта болды. Мейманды «Егемен Қазақстан» РГ» АҚ-тың президенті Сауытбек Абдрахманов басылым ұжымымен таныстыра келе, оның «Невада-Семей» қозғалысындағы белсенді қызметін атап көрсетті. Кездесуде С.Картоев еліміздің ядролық қаруға қарсы күресте жеткен табыстарына кеңінен тоқталды әрі аталған қозғалысқа барынша қолдау білдірген тұлғаларды еске салды. Әсіресе, Мемлекет басшысы Нұрсұлтан Назарбаевтың ядролық қаруды таратпауды мақсат еткен батыл бастамаларын көңіл толқыта отырып әңгімелеп берді. Сондай-ақ, редакция қонағы аталған қозғалысты құрған көрнекті азамат Олжас Сүлейменовтің де ерен еңбегін, төккен терін жоғары бағалайтынын айтты. Басқосуда белгілі журналист Сүлей­мен Мәмет Президенттің Қазақстанды ядролық қарусыз елге айналдырғаны көргенді іс болғанын және қозғалысты құрған қайсар азаматтардың ерлігі ел жадынан өшпейтінін жеткізді. Жиын соңында С.Картоев жақында ғана 95 жылдығын тойлаған басылымның ядролық қаруға қарсы күресте әрдайым алдыңғы шептен көрініп келе жатқанын айта келіп, газет басшысы Сауытбек Абдрахмановтың омырауына «Невада-Семей» қозғалысының 25 жылдығына орай тағайындалған мерекелік медальды тақты. Сондай-ақ, журналист Ләйла Еділқызына арнайы диплом табысталды. «Егемен-ақпарат». Суретті түсірген Ерлан ОМАРОВ.