Автобустар тұрақты бақылауға алынады

Атырау қаласында да жолаушылар тасымалдайтын автобустар жұмысына көңілі толмайтындар бар. Сирек болса да тұрғындар сондай шағымын тілші қосынына хабарлап тұрады. Мұндай шағымдар қалалық әкімдікке де жеткен болуы керек, енді жолаушы тасымалдайтын автобустар қозғалысы GPS-пен бақылауға алынғалы отыр. Атырау қаласының әкімі Нұрлыбек Ожаевтың жергілікті жолаушы тасымалдаушылармен өткізген кеңесінде нақ осы мәселе мақұлданды. Бұған дейін, яғни өткен жыл­дың күзінде қалалық әкімдіктің қызметкерлері Ас­танадағы қоғам­дық көлікте GPS жүйесін енгізу тәжірибесіне зерттеу жүргізіпті. Ал Атырау­дағы алғашқы тәжірибе №4 маршрутта қатынайтын авто­бус­тарға енгізілген. Осы бағыттағы 12 автобусқа GPS жүйе­сі қон­дырылып, қоғамдық көліктің аялдамаларға келуі уақыты, ұзақ тұруы мен салонға адамның шектен тыс көп мінуі, жүргізушілердің жол қозғалысы ере­жесін сақтауы бақылауға алынған. – Бұл жүйе қоғамдық көлік­терде жолаушы тасымалын жақсартуға септігін тигізеді. GPS жүйесін қаладағы 200-ден астам автобусқа орнатар болсақ, олардың күнделікті қозғалысын, құқық бұзушылықтарды экраннан көріп отыруға болады, – деген Атырау қаласының әкімі Н.Ожаев тиісті маман­­дарға GPS жүйесін енгізудің тиімді жолдарын қарастыруды ұсынды. Мұндай жүйе болашақта Аты­рау қаласындағы такси қыз­метіне де қолданылуы мүмкін. Жолдасбек ШӨПЕҒҰЛ, «Егемен Қазақстан». Атырау облысы.