Сурет:baq.kz
«Аmаnаt» партиясы фракциясының депутаттары Нұржан Әшімбетов, Жарқынбек Амантай және Вера Ким «ERG Service» ЖШС құрамына кіретін Павлодар машина жасау зауытында болды. Сапар барысында 1955 жылы іске қосылған зауыттың қазіргі заманғы қауіпсіздік стандарттарына сәйкес келетіні және жұмысшыларға қолайлы еңбек жағдайы жасалғаны айтылды.
«2025 жылды Президент жұмысшы мамандықтары жылы деп жариялады. Жастарға кәсіпорын басшылығы ғана емес, мемлекет тарапынан да қолдау көрсетілетініне осында көз жеткіздік. Жас мамандар тәжірибеден өтіп, қызметте өсу мүмкіндігіне ие болады. Бұл – жұмысшы мамандар үшін әлеуметтік қолдау», деді В.Ким.
Ал Мәжіліс депутаттары Айгүл Құспан, Айдос Сарым, Сергей Пономарев, Ринат Зайытов Алматы қаласына сапары аясында Алатау ауданындағы әлеуметтік нысандардың жұмысын бақылады. Сондай-ақ «Жайлы мектеп» ұлттық жобасы аясында салынған жаңа үлгідегі мектепте болды.
«Мемлекет басшысы «Аnа tili» газетіне берген сұхбатында атап өткендей, еліміз бойынша 460 мың оқушыға арналған 217 жайлы мектеп салу жоспарланып отыр. Оның 105-і салынды», деді Айдос Сарым.
Мәжілісмен Нұртай Сабильянов Семей қаласындағы «Орталық» жылу энергетика орталығының жұмысымен танысып, ұжымымен кездесу өткізді. Облыс қайта құрылғанға дейін қаладағы 21 жылу қазандығының 80 пайызының тозығы жеткен еді. Бүгінде жағдай түзеліп келеді. Депутаттың айтуынша, былтыр республикалық бюджеттен қаражаттың бөлінуіне орай олардың ескіруі 60 пайызға төмендеген.
Парламент Мәжілісінің вице-спикері Альберт Рау, депутаттар Екатерина Смышляева, Берік Бейсенғалиев, Еркін Әбіл «МИЛХ» өндірістік кәсіпорны базасында Қостанай облысының бизнес өкілдерімен кездесті. Отырыста қазіргі таңда Мәжілісте қаралып жатқан тауардың шыққан елін анықтау мәселелері бойынша заңнамалық түзетулер талқыланды. Көтерілген негізгі мәселенің бірі сертификаттау рәсімдерін жеңілдету болды. Бизнес өкілдері жаңа талаптар аясында өнімнің шығу тегін растау үдерісінің күрделене түсуі мүмкін деген алаңдаушылығын білдірді.
«Біздің міндетіміз – аттестациялау үдерісінде қарапайымдылық пен тиімділікті қамтамасыз ететін, артық әкімшілік ауыртпалықтарды болдырмайтын жүйе құру. Заң жобасы кәсіпкерлерді қолдауға және мемлекеттік органдармен өзара іс-әрекетті жеңілдетуге бағытталған», деді А.Рау.
Ақтөбе облысына сапары барысында Мәжілістің вице-спикері Дания Еспаева мен депутат Жұлдыз Сүлейменова көпсалалы облыстық балалар ауруханасы ұжымымен кездесті. Кездесуде дәрігерлер медициналық құрал-жабдықтардың және операция жасауға бөлінетін қаражаттың жеткіліксіздігін айтып, ауданаралық хирургиялық бөлімшелер ашу туралы ұсыныстарын жеткізді.
Мәжіліс депутаттары Әділ Жұбанов пен Дүйсенбай Тұрғанов Атырау облысы Жылыой ауданына сапары барысында Жем өзені мен Құрсай өзектерінің түбін тереңдету жобасының орындалу барысын көріп қайтты. Сапар аясында депутаттар тұрғындармен кездесіп, олардың тұрмыс-тіршілігін, өңірдегі экологиялық жағдайды және атқарылып жатқан жұмыстарды талқылады.
Халықпен кездесу аясында депутат Дәулет Тұрлыханов Астана қаласындағы «Қазақстан» спорт кешенінің жағдайымен танысты. Ал Мәжілістегі «Инклюзивті Парламент» депутаттық тобының жетекшісі Ерлан Әбдиев Ордабасы ауданы Темірлан ауылындағы «Шапағат» әлеуметтік қызметтер көрсету орталығына барды. Орталықтағы азаматтар көкейкесті мәселелерін ортаға салып, оларды шешу бойынша ұсыныстарын жеткізді.
