Туған елінің әр өлкесін шынайы бейнелейтін суретші өз туындыларында уақыт пен болмыстың әсерлі құбылыстарын ерекше динамикалық ырғақпен жеткізеді. Қылқалам шеберінің палитрасы күрделi болғанмен, көрермен үшін сюжеттік композицияны жеңіл қабылдауына мүмкіндік береді. Айталық, «Ақжар», «Туған жер – Беріктас», «Жаркент. Іле өзені», «Суықсай», «Текелі тауы», «Келес өзені», «Каменка плато» атты туындылары қоршаған әлемнің ерекше сұлулығын қанық және кереғар түстерді үндестіре, өзара үйлестіре, табиғаттың қас-қағым сәтін мәңгілікке айналдырады.
«Пейзаж жанрында ол көргенін жазып қана қоймай, туған өлкенің табиғатын зерттеп, нәзік иірімін анық әрі әсем бейнелей отырып, тамашалаған адамның әсерлі сезімде сол атмосфераны қабылдауын және есте сақтауын көздейді. Суретші-пейзажист күнделікті қозғалыстағы құбылыстың бір сәтке уақытты тоқтатып, сол сәттегі шексіз кеңістіктің мәңгілік құндылығын сезінуге мүмкіндік береді. Сондықтан да табиғаттың тылсым құбылысын көру, сезіну және әсерлі жеткізу – суретші үшін маңызды сәт» дейді суретші көрмесінің ерекшелігімен таныстырған өнертанушы, Музей педагогикасы және экскурсия қызметі бөлімінің жетекшісі Гүлнар Жұбаниязова.
Марат Тотеев портреттік жанрда да өзінің ерекшелігін танытады. Ол реңктер, текстура, жарық арқылы адам келбетінің нақтылығына ғана емес, бейненің ішкі әлемін, сезімін көрсетуге ерекше мән береді. Шығармашылығында портреттік жұмыстары арқылы тарих бетін қайта парақтауға үндейтін туындыларының өзі бір шоғыр. Көрмеде өз заманында озық туған, бірақ тарихта есімі аталмай қалған белгілі тұлғалардың бірі, әскери қызмет атқарған этнограф, тарихшы Ғазы Болатұлы Уәлиханның, Шоқан Уәлихановтың жұбайы Айсара Көшенқызының портреті қойылған. Суретші тарихи тұлғалардың бейнесін кенеп үстінде кескіндей отырып, сол уақыт белесінің ақиқатын көрсеткісі келеді.
Суретші Марат Мұхамедқалиұлының туындылары Қырғызстан, Түркия, Германия, Америка, Үндістан коллекционерлерінің қорынан орын алады.
АЛМАТЫ
