«Ембімұнайгаз» АҚ бас директоры Ринат Ізмұханбеттің мәліметінше, мұнайшылар былтыр 2,79 млн тонна көмірсутекті шикізат өндіріп, жоспар 17 мың тоннаға асыра орындалыпты. Енді Батыс Прорва кен орнындағы газ шоғырын игеру үшін инфрақұрылымды кеңейту жұмыстары қолға алынып отыр. Аталған жобаны үш кезеңмен іске асыру көзделеді.
«Биылғы маусымда бірінші кезеңі іске қосылады. Бұл компанияның мұнай өндіру көлемін жылына 45 мың тоннаға, газ өндіруді 160 млн текше метрге дейін ұлғайтуға мүмкіндік береді. 2026–2027 жылдары жобаның екінші және үшінші кезеңін іске асыру жоспарланды. Екінші кезеңде газ дайындаудың өндірістік қуаты 350 млн текше метрге жеткізіледі. Үшінші кезеңде бұл көрсеткіш 600 млн текше метрге ұлғаяды», дейді Р.Ізмұханбет.
Бас директордың айтуынша, биыл Прорва кен орнындағы мұнай дайындау және айдау цехын реконструкциялау және жаңғырту жобасын әзірлеу жұмыстары басталады. Аталған жоба ескірген жабдықты кезең-кезеңімен ауыстыруға, технологиялық схеманы жаңартуға бағытталып отыр. Бұл жабдықтың сенімділігін арттыруға және өнім беруді жылына 3 млн тоннаға дейін ұлғайтуға жол ашады. Жаңғырту жаңа кен орындарында «қара алтын» өндіру көлемінің жоспарлы ұлғаюына байланысты жүргізіледі.
«Жыл соңына дейін Батыс Қарасор кен орнында мұнай өндіруді бастау міндеті қойылды. Кен орнын игерудің ең жоғары деңгейінде қосымша 60-65 мың тонна мұнай өндіру болады. Тағы бір инвестициялық жоба – Оңтүстік-Шығыс Новобогат кен орнында газ дайындау қондырғысын салу. Кен орындарында игеру жұмыстарын бастау 100 мың тонна мұнай алуға мүмкіндік береді», дейді Р.Ізмұханбет.
Мұндай жобаларды іске асырудың тиімділігі неде? Бас директор Ринат Ізмұхамбеттің пікірінше, бұл алдымен мұнай мен газ өндіру көлемін ұлғайтуға серпін береді. Екіншіден, компанияның тұрақты дамуын қамтамасыз етеді. Үшіншіден, өңірдегі әлеуметтік тұрақтылықты сақтауға оң әсерін тигізеді.
«ҚазМұнайГаз» ҰК» АҚ басқарма төрағасы Асхат Хасеновтің мәлімдеуінше, отандық мұнайшыларға ескі кен орындарын тиімді пайдалану деңгейіне шығару міндеті қойылып отыр.
Қазір Атыраудағы еншілес компанияның бас кеңсесіндегі визуализация орталығының функционалды мүмкіндігі кеңейген. Өндірістік қызметті тиімді басқару және деректерге сараптама жүргізу үшін технологиялар ұдайы жетілдіріледі. Орталықтағы монитордан кен орындарындағы мұнай өндіру үдерісін, көлік қозғалысын бақылауға болады. Мәселен, Қызылқоға ауданындағы «Уаз» кен орнында 2016 жылы «Интеллектуалды кен орны» жобасы іске қосылған. Бұл – жаңа инновациялық технология трансформациялау бағдарламасы аясындағы қанатқақты жобаның бірінші кезегі. Ал интеллектуалды кен орны – мұнай қорын оңтайлы игеру үшін басқару пультіне ұңғымалардан ақпаратты беруге жол ашатын инновациялық технология. Мамандардың түсіндіруінше, біріншіден, интеллектуалды ұңғымалардың дерегі үздіксіз өңделеді. Екіншіден, жедел бақылау жүргізіледі. Үшіншіден, шұғыл шешімдер қабылдау үшін ақпараттарға мониторинг жасалады.
Компанияда тиімділігі дәлелденіп отырған тағы бір цифрлық бастама – жол қозғалысы қауіпсіздігін қамтамасыз етуге арналған «Сапарларды басқару» жобасы. «Ембімұнайгаз» АҚ-да көліктер мен арнайы техникалардың жылдамдығы, қозғалысы, тіпті бағытынан ауытқу мен жүргізушінің, не өзге маманның қауіпсіздік белдігін таққаны не тақпағаны арнайы мониторда көрініп тұрады. Көлік құралдарының бірыңғай мониторингі қызметінің нәтижесінде жол-көлік оқиғаларының саны күрт азайып, жанармайды үнемдеу үлесі артқан.
Қазір «Ембімұнайгаз» АҚ мұнайшылары төрт ауданнан мұнай өндіреді. Соның бірі – қазақ мұнайының алғашқы тамшысы алынған Жылыой ауданы. Мұнда екі кәсіпорынның бірігуімен қайта құрылған «Жылыоймұнайгаз» мұнай-газ өндіру басқармасы бар. Компанияның бұл ауданда кен орны да, мұнайшысы да көп. Прорва кен алаңындағы ілеспе газды кешенді дайындау қондырғысы 2017 жылы іске қосылған. Оған 90 адам жұмысқа тартылған. Қондырғы 150 млн текше метр газ өңдейді. Ілеспе газды өңдеу технологиясы экологиялық қауіпсіз әрі күкіртсутекті жоюда жоғары тиімділікті қамтамасыз етеді. Газды кешенді дайындау жұмысы толығымен автоматтандырылып, төтенше жағдайдан бірнеше деңгейлі қорғаныспен қамтылған. Өңделген газдың 90 млн текше метрі құбырмен жөнелтіледі. 35 млн текше метр газ кен алаңдарындағы өндірістік қажеттілік үшін пайдаланылады. Ілеспе газдың өзге бөлігінен күкірт түйіршіктеледі. Мұнда жылына 2 700 тонна түйіршіктелген күкірт шығарылады.
Атырау облысы
