Байқауға 200-ден астам материал түскен. 7 аталым бойынша үздік үміткерлер анықталған. Оның ішінде телевизия, радио саласында «Үздік бағдарлама», дәстүрлі баспасөз бағытында «Үздік аналитикалық материал», сосын «Үздік танымдық материал», «Үздік сұхбат», «Үздік фотосурет», «Шетелдік БАҚ-та жарияланған үздік материал», «Әлеуметтік желідегі үздік материал» сынды аталымдар бар. Жұмыстарды Парламент Сенатының депутаты, Бас редакторлар клубының президенті Бибігүл Жексенбай, Парламент мәжілісінің депутаты Анас Баққожаев, Жанарбек Әшімжан, Максим Рожин, Сыртқы істер министрлігі Қоғамдық дипломатия басқармасының басшысы Ілияс Омаров сынды қазылар құрамы қарап, сараптаған.
Жеңімпаздарды марапаттау салтанатында Ұлттық спорт қауымдастығының президенті Исламбек Салжанов ұлттық спортты насихаттауға БАҚ өкілдерінің қосқан үлесі зор екенін айтып, жүлдегерлерді құттықтады.
«Ұлттық спорт түрлері осы күнге дейін қарқынды дамып келеді. Қауымдастық екі жылда құндылықтарды ұлықтау ісінде аянып қалған жоқ. Түрлі республикалық және халықаралық жарыстар мен V Дүниежүзілік көшпелілер ойындары ұлттық спорттың абыройын одан әрі биіктете түсті. Осы орайда халыққа ақпарат таратып, ұлттық спорттың қыр-сырын насихаттаған БАҚ өкілдеріне алғысымды айтамын», деді И.Салжанов.
Сонымен «Үздік аналитикалық материал» аталымында «Egemen Qazaqstan» газетінің тілшісі Қуаныш Нұрданбекұлы бірінші орынды жеңіп алды. Әріптесіміз байқауға «Дүниеге естіледі дүбірі» атты мақаласын ұсыныпты. Бұл аталымда «Наш Костанай» газетінің тілшісі Асхат Абул-Кадырұлы екінші орын еншілесе, «AIQYN» қоғамдық-саяси газетінің тілшісі Наурызбек Саршаев үшінші орын алды.
Толықтыра кетсек, байқаудың өз деңгейінде өтуіне Бас редакторлар клубы мен Ұлттық медиа қауымдастығы қолдау көрсеткен. Үздіктердің арасынан қара үзіп, 1-орын иеленгендер – 1 000 000 теңге, 2-орын алғандар – 700 000 мың теңге, 3-орын жеңіп алғандар – 500 000 мың теңге қаржылай сыйақымен қоса «АLAMAN» халықаралық медиа байқауының тұғырын алды.
