Қазақстан мен Ресейге бірдей өтімді «Новый день» және «Просто» сауда белгісімен әйгілі «Милх» серіктестігі ірімшік, сарымай, қаймақ, айран, кілегейден бастап балмұздаққа дейін тәулігіне 250 тоннадан астам сүт өнімдерін шығарады. Компанияның 4 зауыты бар, оның біреуі Қостанайдан 90 шақырым жердегі Меңдіқара ауданы Боровской ауылында орналасқан. Бүгінде төрт зауытта 710 адам еңбек етіп жатыр.
Серіктестік немістің «Deutsches Milchkontor Gmbh» компаниясымен бірлесіп, өткен жылдың қараша айында Боровской ауылында қатты ірімшіктің жиырмадан астам түрін шығаратын ірі өндіріс орнын іске қосқан.
Кәсіпорынның ғана емес, бүтіндей бір өңірдің өндіріс саласына серпін берген ауқымды жобаға 7,2 млрд теңге инвестиция салынды. Кәсіпорын акциясының 90 пайыздан астамы неміс компаниясына тиесілі. Жаңа зауытқа «Karl Schnel», «Reih» тәрізді әлемдік тамақ өндірісінде белгілі неміс компанияларының өндірістік құрылғылары орнатылды. Өндіріс желілерінің бәрі толықтай автоматты жүйеде жұмыс істейді. Ауыл өнімін әлемге таратып жатқан кәсіпорында 35 адам еңбек етеді.
«Милх» өнімдері бүгінде еліміздің барлық аймағына, Ресейдің Мәскеу, Санкт-Петербург, Челябі, Новосібір, Ор, Петропавл-Камчатск, Иркутск, Саха өңірлеріне экспортталады.
Мұның сыртында, компания өз өнімдерін Батыс Еуропа нарығына шығаруды көздеп отыр. «Милх» серіктестігінің Германиядағы әріптесі «Deutsches Milchkontor Gmbh» компаниясының Еуропа елдерінде 300-ден аса супермаркеті бар. Таяуда ғана қос тарап Қостанай ірімшіктерін осы сауда нүктелеріне шығарудың жай-жапсарын пысықтап, ортақ мәмілеге келген. Компания өнімдерінің Еуропа нарығындағы жылдық сауда айналымының көлемі шамамен 500 млн еуродан асатын болады.
Келісілген жоба бойынша Қостанай сүт өнімдерінің ең ірі сауда нүктесі Гамбургте болады. Одан әрі бүкіл Германияға, одан қалды Лондон, Варшава, Амстердам, Брюссель, Париж, Вена, Мадрид, Миланға тарайды.
«Кезінде Қазақстаннан сыртқа қоныс аударған жұрттың біразы бүгінде Еуропа елдерінде тұрып жатыр. Олар Қазақстан өнімдерінің табиғи шикізаттан жасалатынын жақсы біледі. Сондықтан ол жақтағы тұтынушылар біздің тауарларымызды аттай қалап алатынына сенімдіміз», дейді компания басшысы Сергей Блок.
Сауда және интеграция министрі Арман Шаққалиев компания жұмысына жоғары баға беріп, кәсіпорын басшысы Сергей Блокқа отандық өнімнің еуропа нарығына шығаруға барынша қолдау көрсететінін айтты.
«Милх» бүгінде Қостанайдың маңайындағы елді мекендерде сиыр ұстап отырған
12 мың отбасынан сүт сатып алады. Осының нәтижесінде 40 мың адам тұрақты табыс тауып отыр. Олардың қатарында Қостанай ауданына қарасты Московский ауылындағы «Болашақ» ауылшаруашылық кооперативі де бар. Кооператив басшысы Азат Мишторийдің айтуынша, ауыл тұрғындары бірігіп, сүт өндіріп сатуға жұмылғалы қолдағы сауын сиырдан түсетін табыс та еселене түскен.
Дегенмен өндірісі ауқымды кәсіпорын, әсіресе қыс маусымында шикізаттан қысылып қалады. Компания басшысы өндіріске қажетті көлемде сүт жетпей қалатын кездер болып тұратынын, бірақ мұның бәрі алдағы уақытта шешімі табылатын уақытша қиындық екенін айтты. Өйткені бүгінде өңірде мыңдап сиыр ұстайтын көптеген ірі сүт фермалары салынып жатыр. Бұл фермалар іске қосылып, өнім бере бастаса, өндіріс те шикізаттан тарықпайды.
Арман Шаққалиев жұмыс сапарының соңында өңір тұрғындарымен, жеке кәсіпкерлермен кездесіп, көптің көкейінде жүрген бірталай сауалдарға жауап берді.
Қостанай облысы
