Суретті түсірген – Нұрғали ЖҰМАҒАЗЫ
Фристайл-акробатикадан ерлер құрамасы Қытайдағы қысқы аламанда топ жарды. Шерзод Хаширбаев пен Роман Иванов басты қарсыластарын қапы қалдырды. Бұл алтын медальдың тарихи мән-маңызы айрықша. Жігіттеріміз синхронды секіруде 97,92 ұпай жинап Азия рекордын жаңартты.
Азия ойындары Харбинмен қатар Ябули қаласында да өткізіліп жатыр. Ябулидің тау бөктерінде биатлон, шаңғы жарысы, тау шаңғысы, ски-альпинизм, фристайл акробатика спортынан сайыстар ұйымдастырылған.
– Фристайл-акробатикадан синхронды секіруде қысқы Азия ойындарының чемпионы атандық. Бұрын-соңды осы сайыс түрінен алтын медаль бұйырған жоқ. Бірінші секіргенде Роман екеуміздің акробатикалық әдісіміз ойдағыдай болмады, қимылымыз бірдей көрінген жоқ. Одан кейін бапкерлер абдырамауды, қателікке бой алдырмай орындауды шегелеп тапсырды. Оқу-жаттығу кезінде жасап жүрген әдіс. Соны тағы да қателіксіз орындадық, – деді Ш.Хаширбаев.
Әйелдер арасындағы сайыста фристайл-акробатикадан синхронды секіруде Ардана Маханова мен Аяна Жолдас қысқы Азия ойындарының қола жүлдегері атанды.
Шаңғышы акробаттардың жеңісіне жеңіс үстеген шаңғышылар да жанкүйер сенімін ақтай білді. Биатлоннан 10 шақырымдық спринтте Владислав Киреев алтын медаль еншілесе, тағы бір саңлақ Вадим Куралес көмбеге екінші жетіп, күміс жүлде иеленді. Қалған шаңғышылар да ондыққа енді: Әсет Дүйсенов 6, Александр Мухин 7-орынды місе тұтты.
– Қысқы Азия ойындарына тек алтын медаль олжалау үшін келдік. Алда әлі командалық сайыс бар. Жекелей жарыста желдің қарсы ұйтқуы да жылдамдықты тежеп, айтарлықтай кедергісін тигізді. Жер бауырлай жатып нысананы көздеуде қателік жібердім, жел екпіні оқтың бағытын сәл бұрып жіберді. Ал тік тұрып нысана көздеуде барлық мүмкіндікті мүлт жібермедім, – деді В.Киреев.
Азия ойындарына спортшыларымызды қолдауға арнайы барған Ұлттық Олимпиада комитетінің президенті Геннадий Головкин мен Туризм және спорт министрі Ербол Мырзабосынов саңлақтардың жетістігі ұйымшылдықпен атқарылған еңбектің нәтижесі екенін атап өтті.
– Фристайл-акробатикадан отандастарымыз Шерзод Хаширбаев пен Роман Иванов Азия ойындарының чемпионы атанды. Ерлер арасындағы синхронды секіруде сынға түскен жерлестеріміз екінші мүмкіндіктерінде бар шеберліктерін көрсетіп, азулы Қытай құрамасының алтыннан үмітті екі құрамын да басып озды. Бұл медальдың еліміз үшін маңызы зор. Бұл – қысқы Азия ойындары тарихында отандастарымыз фристайл-акробатикадан жеңіп алған тұңғыш алтын медаль. Осы жеңіске үлес қосқан жаттықтырушылар мен команданың еңбегін ерекше атап өткен жөн. Спортшыларымыздың қажырлы еңбегі мен үздіксіз дайындықтарының арқасында осындай үлкен жетістікке қол жеткізіп отырмыз. Фристайл-акробатикадағы жігіттердің алтынынан кейін іле-шала биатлон спортындағы саңлақтарымыз ел қоржынына бір алтын, бір күміс жүлде салды. 10 шақырымға спринттік жарыста Владислав Киреев мәре сызығын бірінші кесіп, мерейімізді тасытты. Тағы бір отандасымыз Вадим Куралес те екінші орынға ие болып, күміс жүлдегер атанды. Спортшыларымыз бұл жүлдемен шектеліп қалмайды деп сенемін. Бірер күннен соң олар командалық сында жарыс жолына шығып, тағы да жоғары жетістігімен қуантады деп үміттенеміз, – деді Е.Мырзабосынов.
Ябули қаласының тау сілемдеріндегі сан салалы жолдарда сайысқа түскен шаңғышыларымызға да медаль бұйырды. Әйелдер арасындағы эстафеталық тартыста (4х5 км) Камила Елғазинова, Ксения Шалыгина классикалық әдісте жарыс жолына шықса, Ангелина Шурыга, Надежда Степашкина еркін әдіспен жарысты түйіндеп, күміс жүлдеге қол жеткізді. Азия ойындарының алтынын Қытай қыздары алды, қола жүлде Жапония спортшыларына бұйырды.
Ерлер сайысында төрт спортшымыз эстафеталық тартысты жақсы бастаған еді. Классикалық әдіспен жарыс жолына шыққан Константин Борцов қарсыластарынан оқ бойы озып келді. Эстафетаны қабыл алып жарысты жалғаған Наиль Башмаков, күшін күні бұрын сарқып алды ма, мәреге таянғанда жылдамдығын бәсеңдетіп қалды. Еркін әдіспен сайысты жалғастырған Олжас Климин көш бастап келіп тізгінді Владислав Коволёвке ұстатты. Бірақ Қытай мен Жапония спортшылары жерлесімізден оқ бойы ұзап алып, жеткізбеді. Осылайша, ерлер құрамасына эстафеталық сайыстың қола медалі бұйырды.
Әзірге спортшыларымыздың еншісінде 3 алтын, 7 күміс, 5 қола медаль бар.
