Еліміздің теннисшілері алғашқы айналымда Аустралиядан 2:1 есебімен айласын асырды. Кеше Колумбиямен күш сынасты. Оңтүстік Америка құрлығынан келген ойыншылар жерлестерімізге жарытып қарсылық көрсете алмады. Юлия Путинцева Валентина Арриасты 6:0, 6:1 есебімен ойсырата ұтты. Юлияға небәрі 38 минут жеткілікті болды. Елена Рыбакинаға да өз қарсыласы Юлиана Лизаразоны бар-жоғы 52 минутта жеңді – 6:1, 6:2.
Соңғы жұптық сайыс та біздің қыздардың пайдасына шешілді. Зарина Диас пен Жібек Құламбаева Перес Гарсия/Юлиана Лизаразо жұбын үш сетте жеңді – 6:2, 5:7, 6:4. Еліміздің құрамасы енді 16-21 қыркүйек аралығында Қытайдың Шэньчжэн қаласында жалауы желбірейтін жарыстың финалдық бөлігінде күш сынасады.
Билли Джин Кинг кубогі 1963 жылдан бері ұйымдастырылып келеді. 2020 жылға дейін ол Федерация кубогі деп аталды. Осы турнирде ең мол олжаға АҚШ құрамасы кенелді. Америкалықтар 18 жарыста алдына жан салмады. Чехияның 11 мәрте мерейі үстем болса, Аустралияның алты аламанда асығы алшысынан түсті. Жекелеген теннисшілер арасынан Крис Эвертке тең келер ешкім жоқ. ХХ ғасырдың 70-80 жылдары жасындай жарқылдаған АҚШ-тың Флорида штатының тумасы 8 турнирде топ жарды. Ал Билли Джин Кингтің өзі жеті рет жеңіс тойын тойлады.
Осыған дейін еліміздің құрамасы аталған жарыстың финалдық бөлгінде 2022, 2023 жылдары өнер көрсетті. Бірақ қадамымыз сәтті болмады. Жерлестеріміз осы жолы барынша нәтижелі ойын өрнегін көрсетіп, өз жанкүйерлерін қуантады деген ойдамыз.
