Мамандар қазақстандықтарды арандатушылық әрекеттерге ермеуге және ақпараттың шынайылығын мұқият тексеруге шақырады.
Қазақстандағы Кибершабуылдарды талдау және зерттеу орталығы жасанды интеллект құралдарының көмегімен дайындалған, облыс әкімдері мен басқа да шенеуніктердің бейнелері бейнеленген жалған видеороликтердің анықталғанын хабарлады.
Аталған материалдар көптеген боттардың көмегімен әлеуметтік желілерде таралып, 7 және 9 мамыр күндері өтетін рұқсат етілмеген акцияларға («Мәңгілік полк», «референдум» және тағы басқа) қатысуға үгіттеумен қатар жүруде. Акцияға қатысқандарға ақшалай сыйақы ұсынылатыны айтылған.
Осыған байланысты орталық әлеуметтік желілердегі кез келген ақпараттың шынайылығын мұқият тексеруге кеңес береді. Жалған ақпараттың қоғамда дүрбелең туғызуға бағытталғаны атап өтілді.
Қоса берілген видеода жасанды интеллект арқылы әзірленген жалған бейнематериалдың мысалы көрсетілген.
