Бір ғасырдан аса уақыт бойы ақпарат айдынында қызмет етіп келе жатқан агенттік көрмеде Екінші дүниежүзілік соғыс кезіндегі Қазақстан көрінісін, жан аямай жұмыс істеген тылдағы отандастарымыздың еңбегін, бейнетін бейнелейтін бірегей мұрағат фотосуреттерін көрермен назарына ұсынды. Көрмеге қойылған фотосуреттердің кейіпкерлері – сарбаздар, жұмысшылар, дәрігерлер, ғалымдар. Олардың қатарында аты аңызға айналған ұшқыш, екі мәрте Кеңес Одағының батыры Талғат Бигелдинов, Кеңес Одағының батыры, атақты мерген Әлия Молдағұлова, батыл пулеметші Мәншүк Мәметова, генерал-майор Иван Панфилов, Кеңес Одағының батыры Бауыржан Момышұлы және тағы басқалар бар.
Ұйымдастырушылардың дерегіне сүйенсек, осы сәттерден түсірілген көптеген сурет авторларының есімдері, өкінішке қарай, белгісіз. Сақталған есімдердің арасында В.Гребнев, Ю.Редкин, Галкин бар. Авторын анықтау жұмысы жалғасып жатыр. «Барлығы майдан үшін, бәрі жеңіс үшін!» ұраны сол сындарлы уақыттағы қазақ жұртының өмір салтына еніп, бірлік пен батылдық кезеңіне айналды. Соның нәтижесі болар, жауға қарсы атылған он оқтың тоғызы Қазақстан зауыттарында құйылған. Майданға 1500 вагон азық-түлік, киім-кешек жіберілді. Жеңіл өнеркәсіп кәсіпорындары 2 миллион жауынгер мен офицерді киім-кешекпен қамтамасыз етті. 78 ауруханада жаралылар емделген. Тек қорғаныс қорына еліміз 4 миллион рубльден аса үлес қосыпты. Ал 1945 жылы студенттердің қаражатына салынған танк колоннасы Берлинге шабуыл жасауға қатысты.
Фотокөрме «Нұрлы жол» вокзалының Орталық күту залында өтіп жатыр.
