Фото: 123ru.net
Оқиға орнына облыс әкімі Нұрымбет Сақтағанов арнайы барған. Әкім комиссия мүшелеріне үндеу жасап, өндірістік және еңбек қауіпсіздігіне қатысты қолданыстағы ережелерді түбегейлі қайта қарау қажет екенін айтқан.
«Тыныш, бейбіт заманда өндірістегі қауіпсіздік талаптарының сақталмауы салдарынан адам өліміне жол беру мүлдем орынсыз. Кез келген мекеме үшін ең алдымен адам өмірі мен денсаулығы маңызды болуы тиіс. Облыс әкімдігі атынан қаза тапқандардың отбасына қайғыра көңіл айтамын және жан-жақты көмек көрсетілетінін жеткіземін. Сонымен қатар, тиісті органдарға оқиғаның себептерін анықтау және кінәлілердің жауапкершілігін белгілеу үшін толық әрі әділ тергеу жүргізуді тапсырдым», деді Нұрымбет Сақтағанов.
Арнайы комиссия төрағасы, ШҚО бас еңбек инспекторы Бақытбек Қизатовтың айтуынша, оқиғаға байланысты он күн ішінде жан-жақты тергеу жүргізіледі. Қажет болған жағдайда тергеу мерзімі 30 күнге дейін ұзартылып, салалық сарапшылар тартылады. Тергеу қорытындысы құқық қорғау және сот органдарына жіберіледі.
Облыс әкімі өндірістік жазатайым оқиғалардың алдын алуда кешенді тәсілдің маңыздылығын атап өтіп, мұндай жағдайларда қауіпсіздік пен еңбек қорғау мәселесі аймақ басшылығының тұрақты бақылауында болатынын жеткізген.
Айта кетейік, қаза тапқандардың отбасыларына республикалық бюджеттен өтемақы төленіп, сақтандыру тетіктері арқылы да қажетті көмек көрсетілмек. Аймақ басшысы марқұмдардың туыстарымен жеке кездесіп, олардың назардан тыс қалмайтынын және барынша қолдау көрсетілетінін айтқан.
