Әзірге «Таза Қазақстан» бағдарламасы аясында экологиялық бастамаға қатысуға 300-ден астам студент ниет білдірген. Жоба жетекшілері, жұмысшы жасақтардың негізгі міндеті сенбіліктер мен ағаш отырғызуға қатысу ғана емес, экологиялық жауапкершілікті күшейту мен жастарды қалалық ортадағы өзгерістерге бейімдеу екенін айтады.
Көктемгі кезең басталғалы жасақтар 15-тен астам экологиялық іс-шара өткізген. Олардың дені су қоймаларының жағалауларын тазалау, саябақтарды ретке келтіру, қала маңындағы аймақтарға ағаш отырғызу жұмыстарын құрайды.
Биыл ерекше қорғалатын табиғи аумақтарда жұмыс істеуге назар аударылмақ. Эко-жауынгерлер танымал туристік маршруттарды — Медеу, Көк-Жайлау, Үлкен Алматы көлі және басқа да орындарды тазалаумен айналысады. Сонымен қатар, еріктілер туристік орындарға ақпараттық тақтайшалар орнатып, жадынамалар таратып, таулардағы жауапкершілікті еске салады.
Еске салсақ, жобаға 16 мен 35 жас аралығындағы кез келген азамат — «Жастар рухы Алматы» ЖК, ЖОО және студенттік эко-клубтары арқылы қосыла алады. Қатысушылар ресми мәртебеге, жалақыға және мансаптағы алғашқы қадам болуы мүмкін бірегей тәжірибеге ие болады.
