Барлық мектептер толық қағидат бойынша жабдықталады – бұл қазіргі заманғы сыныптар, зертханалар, шеберханалар, кітапханалар, спортзалдар, асханалар және ерекше білім беру қажеттіліктері бар балаларға арналған бейімделген орта.
Мемлекет басшысының тапсырмасы бойынша 2025 жылдың соңына дейін ұлттық жоба аясында жобалық қуаттылығы 460,4 мың оқушыға арналған 300, 600, 900, 1200, 1500, 2000 және 2500 орындық 217 жайлы мектеп салу жоспарланған. Ал 2024 жылдың қорытындысы бойынша оның 105-і пайдалануға берілді.
Ауылдық аймақтардағы мектептердің құрылысына ерекше назар аударылды: жаңа мекемелердің шамамен 40%-ы бұрын оқу орындарының тапшылығы сезілген жерлерде салынады. Бұл қалалық және ауылдық мектептер арасындағы алшақтықты азайтуға және өңірлерде балаларды оқу үшін лайықты жағдаймен қамтамасыз етуге мүмкіндік береді.
Жоба басымдықтарының бірі – ерте кәсіптік бағдар беру. Бастауыш сыныптарда кәсіби сынамалар, кәсіп өкілдерімен кездесулер, жобалық апталары өткізіледі. Жоғары сыныптарда – терең бейіндеу, тәлімгерлік және жеке білім беру маршруттары. Ол үшін оқушыларға әрі қарай білім беру бағыты мен мамандығын саналы түрде таңдауға көмектесетін "Мансап компасы" цифрлық платформасы енгізіледі.
Осылайша, «Жайлы мектеп» жобасы білім беру саласындағы мемлекеттік саясаттың маңызды элементі және Қазақстанның адами капиталын дамытуға ұзақ мерзімді инвестиция болып табылады.
