Департамент өкілдерінің айтуынша, электронды білезіктердің көмегімен жыл басынан бері 108 сотталған азаматтың тәртіп бұзғаны анықталған. Нәтижесінде, шартты түрде сотталған 29 азамат құзырлы орындардың сенімінен айырылып, жазаның қалған мерзімін темір тордың ар жағында өтейтін болды.
Білезікті пайдаланудың заңмен бекітілген ереже-тәртібі бар. Тәртіп қызметкері сотталған азаматқа міндетті түрде электронды құрылғыға мұқият болуды ескертеді. Оны қалай пайдалану керегін түсіндіріп, қолына осы туралы жадынама ұстатады. Сотталған азаматтың білезікті қасақана бүлдіргені анықталған жағдайда, аталған департамент заңда белгіленген тәртіппен шығынды өндіріп алу жөнінде іс қозғап, оны сотқа жібереді.
«Мұндай бақылау әдісін қолдану пробация қызметі мамандары мен сотталғандар арасындағы жүзбе-жүз қарым-қатынасты едәуір азайтады. Осылайша, жемқорлыққа жол ашуы ықтимал тәуекелді төмендетеді. Сондай-ақ қайтара қылмыс жасаудың алдын алады. Мәселен, кейінгі төрт айдың ішінде электронды бақылау жүйесі арқылы қашықтан қадағаланатын азаматтар арасында бірде-бір қылмыс тіркелген жоқ», дейді облыстық қылмыстық-атқару жүйесі департаменті баспасөз қызметінің хатшысы Динара Молдабаева.
Қостанай облысы
