Кәсіпорынның алпыс жылдық тарихы бар. 1965 жылы Көкшетауда сүт өңдейтін шағын ғана зауыт ашылыпты. 1993 жылы «Сүт» акционерлік қоғамы болып құрылған. Міне, осы кезден бастап өрлеу кезеңі басталады. Өнім түрлерін көбейтіп, байытуға көшкен. 1999 жылы «Көкшетау сүт зауыты» жауапкершілігі шектеулі серіктестігі болып қайта құрылған.
Зауыттың қайта жаңғыруы 2019 жылдан басталды. Міне, сол кезде тәулігіне 50 тонна сүт өңдеуге қуаты қаптал жететін жаңа цех іске қосылған. Балмұздақты әдемілеп қаптау қолға алыныпты. Мұздатқыш камералар жаңғыртылып, кәсіпорынның сүт өңдеу үшін тоқтаусыз жұмыс істеуіне қажетті құрылғы газбен жұмыс істейтін болған. Кейінгі үш жыл ішінде газ қоймасын салып, жаңа су құбырын пайдалануға берді. Автопаркті де жаңғыртып, зауыт өнімін сапалы күйінде тұтынушыға жеткізуге көңіл бөлген. Бүгінде зауыт жыл сайын қала бюджетіне 95 млн теңге төңірегінде салық төлейді.
Компанияның құрамына Көкшетаудағы сүт зауыты мен Солтүстік Қазақстан облысына қарасты Айыртау ауданындағы филиалы енеді. Сүт жинайтын, дайындау кеңселері жұмыс істейді. Дайын өнімді сату да біршама жолға қойылған. Бес цехта 50 түрлі сүт өнімі өндіріледі. Оның ішінде йогурт, сүт, май, қаймақ, айран, түрік айраны, балмұздақтың бірнеше түрі және ұлттық тағам құрт пен қоспа дайындалады.
Кәсіпорын басшыларының айтуынша, зауытты сүт өнімдерімен қамтудағы кінәрат – шикізат тапшылығы. Жазғы маусымда күніне 100 тоннаға жуық сүт өңделсе, қыста бұл көлем азаяды. Тығырықтан шығар жол іздеген кәсіпорын басшылары Зеренді ауданына қарасты Приречен селосында 250 бас сауын сиырға лайықталған тауарлы сүт фермасын ұстап отыр. Көкшетаудан 300 шақырым төңіректегі елдің қолындағы түліктің сүтін сатып алуды ұйымдастыруда. Әрине, әр жерден жиналған сүт болғандықтан, сапасына мейлінше көңіл аудару керек.
Айтпақшы осы арада төрт түліктің сүмесімен күн көріп отырған ауылдағы малсақ ағайын үшін бұл істің тиімділігін де айта кеткен ләзім. Қысы ұзақ солтүстік өңірде сүтін бұлдап сата алмаса, қара мал ұстау тиімсіз. Зауыт ауыл ахуалын жақсартуға да біршама септігін тигізіп отыр. Сүт сапасын тексеру үшін өздерінің зертханасын іске қосқан. Бұл жерде күн сайын шикізаттың және дайын өнімнің сапасы тексеріледі. Зауыт зертханасына Азамат Мырзалин жетекшілік етеді. Шикізатта да, дайын өнімде де қылаудай ауытқу болмауы керек. Осы кірпік қақпай күзететін сапа мәселесін оң жолға қою зауыттың бар шаруасының нәтижелі болуына ықпал етіп тұр.
Өнімді өндіру бар да, тұтынушыға жеткізу бар. Қазір компания 40 автокөлікті пайдаланады. Оның 18-іне мұздатқыш пен тоңазытқыш орнатылған. Қалған техника шикізат пен дайын өнімдерді тасиды. Бір жақсысы, зауытта қол еңбегі барынша азайтылған. Жұмыс ырғағы жаңа заманғы қондырғылармен қамтамасыз етіліп, барынша автоматтандырылған. Мәселен, ұлттық өнім өндіретін цехта 17 жұмысшы еңбек етеді. Олар сықпа құртты қолмен дайындайды. Кәсіпорын басшыларының айтуынша, алдағы уақытта сықпа құрт дайындауға қажетті құрылғы сатып алынбақ. Сол кезде ұлттық өнімнің көлемі де молаяды.
Зауыт өнімдері облыс орталығымен қоса ірі елді мекендердің басым көпшілігіне жеткізеді. Астана қаласында 10 сауда орны бар. Өнім өткізу географиясы да кеңейген. Көкшетаулықтар дайындаған дәмді Ақтау, Алматы, Атырау, Жезқазған, Қарағанды, Қостанай, Қызылорда, Семей, Тараз, Түркістан, Екібастұз қалаларының тұрғындары да татуда.
Ел тірлігіне араласып, қайырымдылық көрсету де әлмисақтан дәстүрге айналған. «Арлан» хоккей клубына өз өнімдерін жеткізіп береді. Компания басшылары өтініш айтып келген мұқтаж жандардың меселін жыққан емес. Балаларды қорғау күні 1700 кило балмұздақ таратып, ұлттық рекорд орнатқан. Бұл игілікті іс Қазақстанның рекордтар кітабына еніпті.
Көкшетау
