Бұл бастама Уильям Шекспир шығармаларының заманауи интерпретациясына арналған үздік спектакльдер мен театр ұжымдарын іріктеуді мақсат етеді. Әлемнің әр түкпірінен ұсынылған 18 театрдың арасынан іріктелген екі үздік ұжымның бірі болып Алматы қаласы Мемлекеттік қуыршақ театры таңдалды. Өнер ордасы Алматы қаласы әкімдігінің қолдауымен Уильям Шекспирдің «Ромео мен Джульетта» спектаклін қуыршақ бейнесінде сахналап, көрерменнің ыстық ықыласына бөленді.
«Біз «Ромео мен Джульетта» спектаклін тамашалап, ерекше әсермен шықтық. Авиньондағы фестивальдың үздік туындыларының бірі деп айта аламын. Көзіме жас алған сәттер де болды. Жоғарғы деңгейде сахналанған, режиссурасы да, актерлік ойыны да керемет. Бізге осындай туындыны көруге мүмкіндік бергендеріңіз үшін алғыс білдіреміз!», деп атап өтті «International Shakespeare Festival Craiova» – фестивалінің ұйымдастырушысы Андрей Стефанескью.
Айта кетейік, алдағы жылы режиссер Дина Жұмабайдың «Ромео мен Джульетта» спектаклі қазақ тілінде әлемдік сахнаға жол тартып, жаңа биікке көтеріледі. Шекспир мұрасын жаңа көзқараспен талқылайтын, түрлі мәдениеттерді байланыстыратын халықаралық диалог алаңына айналған Румыниядағы бұл фестиваль – Алматы қаласының Мемлекеттік қуыршақ театры үшін Франциядағы «Off Avignon» жобасының табысты нәтижесі болды.
Театр әлеміндегі үздік шығармашылық ұжымдармен байланыс орнату, кәсіби тәжірибе алмасу, болашақта бірлескен жобаларды жүзеге асыруға мүмкіндік береді. Осындай көптеген маңызды мақсатты жүзеге асырған «Off Avignon» фестивалі – Алматы қаласы Мемлекеттік қуыршақ театрының Франция, Англия, Германия, Италия сынды елдермен мәдени байланысын кеңейтіп, шығармашылық көкжиегін жаңа деңгейге көтерген маңызды көпірге айналды.
