Хакімнің ақын шәкірттерінің бірі – Көкбай Жанатайұлының жас кезі екен. Ол ұстаз-досы Абай Құнанбайұлына бір жағы әзіл, екінші жағы қағытпа өлең айтқысы келіп, былай депті:
«Жүрісім тұрысымның бәрі Абайша,
Абайдан кем боламын мен қалайша,
Көп закон, аз ғана ақыл өзімде бар,
Ашылып көкірегім кең сарайша».
Хакім жарықтық шәкіртінің сөз саптауына риза болып, бір күліп алып:
«Мен боламын демеңдер,
Аяқты алшаң басқанға,
Екі көзіңді алартып,
Құр қарайсың аспанға,
Бір ғылымнан басқаның,
Бәрі кесел асқанға,
Өйткен адам жолығар,
Кешікпей-ақ нұқсанға».
Бұл қағытпаны газетке ұсынған – атақты абайтанушы Қайым Мұхамедханов екен. Газетте жарияланған нұсқаның соңына автор бұны «Көкбайдың баласының аузынан жазып алдым» деп анықтама беріпті.
Жалпы, Абай мұрасын жинау ісінде Қайым Мұхамедхановтың еңбегі ерен. 2010 жылы Семей қаласында жарық көрген «Тарта көр, Семейімнің топырағы» атты кітаптың 5-бетінде: «Қайым Мұхамедханов 1940 жылдары Абайдың бұрын белгісіз болып келген 9 өлеңін тапты. Олар 1945 жылы жарық көрген ақын шығармаларының толық жинағына енді» деп жазылыпты. Жоғарыда табылған тоғыз өлеңнің бірі осы «қағытпа» екені анық.
